തിരുവനന്തപുരം: അധിക സാമ്പത്തിക ബാധ്യത കണക്കിലെടുത്ത് സംസ്‌ഥാനത്തെ സർക്കാർ, എയ്‌ഡഡ് ഹയർസെക്കണ്ടറികളിൽ ഈ അധ്യയന വർഷം പുതിയ ബാച്ചുകൾ ഉണ്ടാകില്ല. ഇക്കാര്യം തീരുമാനിച്ച് പൊതുവിദ്യാഭ്യാസ വകുപ്പ് ഉത്തരവിറക്കി. മലപ്പുറം ഉൾപ്പടെയുള്ള ജില്ലകളിൽ അധിക ബാച്ചുകൾ വേണമെന്ന് ചൂണ്ടിക്കാട്ടി ഹയർസെക്കണ്ടറി വിഭാഗം നൽകിയ റിപ്പോർട് അവഗണിച്ചാണ് ഉത്തരവ്.
കോവിഡ് സാഹചര്യത്തിൽ ഓൺലൈൻ ക്‌ളാസുകളാണ് ഇപ്പോൾ നടക്കുന്നതെന്നും പൂർണ തോതിൽ നേരിട്ട് ക്‌ളാസുകൾ നടത്തുന്നതിനുള്ള സാധ്യത ഉടനെ ഉണ്ടാകില്ലെന്നുമാണ് പൊതുവിദ്യാഭ്യാസ വകുപ്പിന്റെ നിലപാട്. സീറ്റ് കുറവുള്ള ജില്ലകളിൽ അധിക സീറ്റുകൾ അനുവദിച്ചിട്ടുണ്ടെന്നും വിദ്യാഭ്യാസ വകുപ്പ് പുറത്തിറക്കിയ ഉത്തരവിൽ പറയുന്നു.
വിവിധ ജില്ലകളിലെ ഹയർസെക്കണ്ടറി മേഖലയിലെ വിദ്യാഭ്യാസ ആവശ്യകത പരിശോധിച്ച് റിപ്പോർട് സമർപ്പിക്കാൻ മേഖല ഉപമേധാവി കൺവീനറായ ജില്ലാതല കമ്മിറ്റിയും പൊതുവിദ്യാഭ്യാസ മേധാവി അധ്യക്ഷനായ സംസ്‌ഥാനതല കമ്മിറ്റിയും രൂപീകരിച്ചിരുന്നു. ഈ കമ്മിറ്റികൾ സർക്കാറിന് റിപ്പോർട് സമർപ്പിക്കുകയും ചെയ്‌തിരുന്നു. മലപ്പുറം ജില്ലയിൽ മാത്രം 167 ബാച്ചുകൾ ആവശ്യമാണെന്ന് ഹയർസെക്കണ്ടറി വിഭാഗം മുൻവർഷങ്ങളിലെ അപേക്ഷകരുടെ എണ്ണവും പ്രവേശനവും പരിശോധിച്ചാണ് റിപ്പോർട് നൽകിയത്.
അതേസമയം, മുഴുവൻ വിഷയങ്ങളിലും എ പ്ളസ് നേടിയ കുട്ടികളുടെ എണ്ണം മൂന്നിരട്ടിയോളം വർധിച്ചതോടെ ഇഷ്ട സ്കൂളിനും വിഷയ കോമ്പിനേഷനും വേണ്ടി വിദ്യാർഥികൾ അലയുകയാണ്. ഇതിനിടെയാണ് ബാച്ചുകൾ വേണ്ടെന്ന തീരുമാനം.
Also Read: തീവ്രസ്വഭാവമുള്ള ഗ്രൂപ്പുകൾ സജീവം; ക്‌ളബ് ഹൗസ് പോലീസ് നിരീക്ഷണത്തിൽ
