ന്യൂഡെല്‍ഹി : രാജ്യത്ത് കഴിഞ്ഞ മൂന്ന് ദിവസങ്ങളിലായി റിപ്പോര്‍ട്ട് ചെയ്യുന്ന കോവിഡ് കേസുകളുടെ എണ്ണം നാല്‍പ്പത്തിനായിരത്തിന് താഴെയെത്തി. കഴിഞ്ഞ 24 മണിക്കൂറില്‍ രാജ്യത്ത് കോവിഡ് സ്‌ഥിരീകരിച്ചത് 35,551 ആളുകള്‍ക്കാണ്. ഇതോടെ രാജ്യത്ത് റിപ്പോര്‍ട്ട് ചെയ്‌ത ആകെ കോവിഡ് കേസുകളുടെ എണ്ണം 95.34 ലക്ഷം കടന്നു. കൂടാതെ കഴിഞ്ഞ ദിവസം മാത്രം രാജ്യത്ത് 526 പേര്‍ കൂടി കോവിഡ് ബാധിച്ച് മരിച്ചിട്ടുണ്ട്. നിലവില്‍ രാജ്യത്തെ ആകെ കോവിഡ് മരണസംഖ്യ 1,38,684 ആണ്.
കഴിഞ്ഞ 24 മണിക്കൂറിലെ കണക്കുകൾ കൂടിയായപ്പോള്‍ രാജ്യത്തിതുവരെ രോഗമുക്‌തരായ ആകെ ആളുകളുടെ എണ്ണം 89,73,373 ആയി ഉയര്‍ന്നു. ഇതോടെ രാജ്യത്തെ രോഗമുക്‌തരുടെ എണ്ണം 90 ലക്ഷത്തിലേക്ക് അടുക്കുകയാണ്. കൂടാതെ രോഗവ്യാപനം ഉയർന്നു നിന്നിരുന്ന ഡെല്‍ഹിയില്‍ ഇപ്പോൾ റിപ്പോര്‍ട്ട് ചെയ്യുന്ന കോവിഡ് കേസുകളില്‍ താരതമ്യേന കുറവ് രേഖപ്പെടുത്തുന്നുണ്ട്. എന്നാല്‍ കേരളത്തില്‍ ദിനംപ്രതി റിപ്പോര്‍ട്ട് ചെയ്യുന്ന കോവിഡ് കേസുകള്‍ ഉയരുകയാണ്.
രാജ്യത്ത് കൂടുതല്‍ കോവിഡ് കേസുകള്‍ റിപ്പോര്‍ട്ട് ചെയ്യുന്നത് കേരളം, ഡെല്‍ഹി, മഹാരാഷ്‌ട്ര, ബംഗാള്‍, രാജസ്‌ഥാന്‍ എന്നിവിടങ്ങളിലാണ്. കൂടാതെ 2021 ജനുവരി ആദ്യമോ, ഫെബ്രുവരി ആദ്യമോ കര്‍ണാടകയില്‍ കോവിഡിന്റെ രണ്ടാം വ്യാപനം ഉണ്ടാകാനുള്ള സാധ്യത അധികൃതര്‍ മുന്നോട്ട് വെക്കുന്നുണ്ട്.
Read also : ശശികല ഉടന്‍ ജയില്‍മോചിത ആയേക്കും; അന്തിമ തീരുമാനം ഒരാഴ്‌ചക്കുള്ളില്‍
