തിരുവനന്തപുരം: കേരള രാഷ്‌ട്രീയത്തില്‍ സജീവമാകാന്‍ തീരുമാനിച്ചിരിക്കുന്ന പി കെ കുഞ്ഞാലിക്കുട്ടി നിമയസഭാ തിരഞ്ഞെടുപ്പില്‍ മല്‍സരിക്കുമെന്ന് റിപ്പോര്‍ട്ടുകള്‍. വേങ്ങര മണ്ഡലത്തില്‍ തന്നെയാകും കുഞ്ഞാലിക്കുട്ടി ജനവിധി തേടുക എന്നാണ് വിവരം.
ദേശീയ രാഷ്‌ട്രീയത്തില്‍ നിന്ന് എന്തുകൊണ്ടാണ് കേരള രാഷ്‌ട്രീയത്തിലേക്ക് കുഞ്ഞാലിക്കുട്ടി തിരിച്ചുവരുന്നത് എന്ന കൃഷി മന്ത്രി വിഎസ് സുനില്‍ കുമാറിന്റെ ചോദ്യത്തിന് പാര്‍ട്ടി നേതൃത്വം ആവശ്യപ്പെട്ടത് കൊണ്ടാണ് കേരള രാഷ്‌ട്രീയത്തിലേക്ക് ശ്രദ്ധ കേന്ദ്രീകരിക്കുന്നതെന്ന് കുഞ്ഞാലിക്കുട്ടി വ്യക്‌തമാക്കി. നിങ്ങളെ കൈകാര്യം ചെയ്യാന്‍ ഒരാള്‍ കൂടി ഇരിക്കട്ടെ എന്ന തമാശ കലര്‍ന്ന മറുപടിയും കുഞ്ഞാലിക്കുട്ടി കൂട്ടിച്ചേര്‍ത്തു. സഭ ടി വിയുടെ പ്രത്യേക അഭിമുഖത്തിലായിരുന്നു എം പിയുടെ പ്രതികരണം.
വേങ്ങര നിയമസഭാ മണ്ഡലം രൂപീകരിച്ചതിന് ശേഷം യുഡിഎഫ് സ്‌ഥാനാര്‍ഥിയായി കേരളത്തില്‍ ഏറ്റവും ഉയര്‍ന്ന ഭൂരിപക്ഷത്തില്‍ വിജയിച്ച നേതാക്കളില്‍ ഒരാളാണ് കുഞ്ഞാലിക്കുട്ടി. എന്നാല്‍ ഇ അഹമ്മദിന്റെ വിയോഗത്തെ തുടര്‍ന്നാണ് കുഞ്ഞാലിക്കുട്ടി ദേശീയ രാഷ്‌ട്രീയത്തിലേക്ക് കയറിയത്.
Read also: ജിഎസ്ടി നഷ്ടപരിഹാരം; കേരളത്തിന് 9006 കോടി
