ചെന്നൈ: മഹാത്‌മാ ഗാന്ധിയെ വെടിവെച്ചു കൊലപ്പെടുത്തിയ നാഥുറാം ഗോഡ്സെയുടെ ചരമവാര്‍ഷികം ആചരിച്ചതിന് തമിഴ്‌നാട്ടില്‍ ശിവസേന നേതാവിനെതിരെ കേസെടുത്തു. ശിവസേനയുടെ യുവജന വിഭാഗമായ യുവസേനയുടെ സംസ്‌ഥാന അധ്യക്ഷന്‍ എ തിരുമുരുകന്‍ ദിനേശിനെതിരെയാണ് തിരുപ്പൂര്‍ നല്ലൂര്‍ പോലീസ് കേസ് രജിസ്‌റ്റര്‍ ചെയ്‌തത്. കഴിഞ്ഞ തിങ്കളാഴ്‌ചയാണ്‌ ദിനേശിന്റെ നേതൃത്വത്തില്‍ ഗോഡ്സെയുടെ ചരവാര്‍ഷികം ആചരിച്ചത്.
രാക്കിപാളയത്തെ പാര്‍ട്ടി ഓഫിസിലായിരുന്നു ചടങ്ങുകള്‍ നടന്നത്. ഗോഡ്സെയുടെ ചിത്രത്തില്‍ പൂക്കള്‍ അര്‍പ്പിക്കല്‍ ഉള്‍പ്പെടെയുള്ള പരിപാടികള്‍ നടന്ന ചടങ്ങില്‍ പത്തിലധികം പേര്‍ പങ്കെടുത്തിരുന്നു. പരിപാടിക്കിടെ ഇവര്‍ തീവ്രവികാരമുണര്‍ത്തുന്ന മുദ്രാവാക്യം വിളിച്ചതായും പോലീസ് പറഞ്ഞു. ഇതേത്തുടര്‍ന്നാണ് ശിവസേന നേതാവിനെതിരെ കേസെടുത്തതെന്നും പോലീസ് അറിയിച്ചു. നവംബർ 15നായിരുന്നു ഗോഡ്സെയുടെ ചരമവാർഷികം.
Read Also: മുല്ലപ്പെരിയാർ കേസ് ഇന്ന് സുപ്രീം കോടതി പരിഗണിക്കും; ജലനിരപ്പ് ഉയർത്തരുതെന്ന് കേരളം
