ദോഹ : കോവിഡ് വ്യാപനം കുറഞ്ഞ രാജ്യങ്ങളുടെ പുതുക്കിയ പട്ടിക ഖത്തര്‍ പുറത്തു വിട്ടു. ഖത്തര്‍ പൊതുജനാരോഗ്യ മന്ത്രാലയമാണ് ഇപ്പോള്‍ പട്ടിക പുറത്തു വിട്ടിരിക്കുന്നത്. മന്ത്രാലയത്തിന്റെ വെബ്സൈറ്റില്‍ പ്രസിദ്ധീകരിച്ച പുതിയ പട്ടികയിലും ഇന്ത്യയുടെ പേര് ഉള്‍പ്പെടുത്തിയിട്ടില്ല. ഖത്തറിലെയും ആഗോള തലത്തില്‍ മറ്റ് രാജ്യങ്ങളുടെയും ആരോഗ്യ സ്‌ഥിതിഗതികള്‍ വിലയിരുത്തിയ ശേഷമാണ് പട്ടികയില്‍ മാറ്റം വരുത്തി പ്രസിദ്ധീകരിക്കുന്നത്.
കോവിഡ് ഭീഷണി കുറഞ്ഞ രാജ്യങ്ങളില്‍ നിന്നാണ് ഇപ്പോള്‍ ഖത്തറിലേക്ക് പ്രവേശനം നല്‍കുന്നത്. ഇത്തരം രാജ്യങ്ങളില്‍ നിന്ന് എത്തുന്ന ആളുകള്‍ വിമാന താവളങ്ങളില്‍ എത്തുമ്പോള്‍ കോവിഡ് പരിശോധനക്ക് വിധേയരാകണം. കൂടാതെ ഹോം ക്വാറന്റൈനില്‍ ഒരാഴ്‌ച കഴിയുമെന്ന് ഉറപ്പ് നല്‍കുന്ന സാക്ഷ്യപത്രം സമര്‍പ്പിക്കുകയും വേണം. പിന്നീട് ഒരാഴ്‌ചയോളം ക്വാറന്റീനില്‍ കഴിയുന്ന സമയത്ത് യാത്രക്കാരന്റെ ഇഹ്തിറാസ് ആപ്പില്‍ മഞ്ഞ നിറം ആയിരിക്കും. ഒരാഴ്‌ചക്ക് ശേഷം യാത്രക്കാരന് വീണ്ടും കോവിഡ് പരിശോധനക്ക് വിധേയമാകണം. ശേഷം ഫലം നെഗറ്റീവ് ആയാല്‍ ഇഹ്തിറാസ് ആപ്പില്‍ പച്ച നിറം ആകും. അതോടെ യാത്രക്കാരന് ക്വാറന്റൈന്‍ അവസാനിപ്പിക്കാം. മറിച്ച് ഫലം പോസിറ്റീവ് ആയാൽ ഉടന്‍ തന്നെ ഐസൊലേഷന്‍ കേന്ദ്രത്തിലേക്ക് മാറ്റും.
Read also : വുഹാനിലേക്കുള്ള ആദ്യ വന്ദേ ഭാരത് സര്‍വീസ് ഒക്‌ടോബർ 30ന്
