മുംബൈ: ഓഹരി വില്പനയില് ക്രമക്കേട് കാണിച്ചതിന് റിലയന്സ് ഇന്ഡസ്ട്രീസ് ഉടമ മുകേഷ് അംബാനിക്കെതിരെ പിഴ ചുമത്തി. മുകേഷ് അംബാനിക്കും മറ്റു രണ്ടു പേര്ക്കുമെതിരെ 70 കോടി രൂപയുടെ പിഴയാണ് വാണിജ്യ വ്യാപാര നിയന്ത്രണ ബോര്ഡായ സെബി ചുമത്തിയിരിക്കുന്നത്.
റിലയന്സ് പെട്രോളിയത്തിന്റെ ഓഹരികള് വില്പന നടത്തിയതിലാണ് സെബി ക്രമക്കേട് കണ്ടെത്തിയത്. മൂന്ന് പാര്ട്ടികളെയാണ് സംഭവത്തില് കുറ്റക്കാരായി കണ്ടെത്തിയിരിക്കുന്നത്. റിലയന്സ് പെട്രോളിയം 25 കോടിയും കമ്പനിയുടെ ചെയര്മാനും മാനേജിംഗ് ഡയറക്ടറുമായ മുകേഷ് അംബാനി 15 കോടിയും നവി മുംബൈ എസ്ഇഇസഡ് 20 കോടിയും മുംബൈ എസ്ഇഇസഡ് 10 കോടിയും പിഴയടക്കണമെന്നാണ് ഉത്തരവിട്ടിരിക്കുന്നത്. 45 ദിവസത്തിനുള്ളില് പിഴയടക്കണം.
2007ല് രജിസ്റ്റര് ചെയ്ത കേസിലാണ് ഇപ്പോള് നടപടിയുണ്ടായിരിക്കുന്നത്. 2007ല് റിലയന്സ് ഇന്ഡസ്ട്രീസ് ലിമിറ്റഡും ബന്ധപ്പെട്ട സ്ഥാപനങ്ങളും റിലയന്സ് പെട്രോളിയവുമായി വ്യാപാരം നടത്തുകയും കൊള്ളലാഭം നേടുകയും ചെയ്തുവെന്നാണ് സെബിയുടെ 95 പേജുള്ള ഉത്തരവില് പറയുന്നത്.
Read Also: മികച്ച ഇന്ത്യൻ ചെസ് താരം; നിഹാൽ സരിന് അംഗീകാരം
