ആലപ്പുഴ: രാജ്യത്തിന്റെ 72ആം റിപ്പബ്ളിക് ദിനാഘോഷങ്ങൾ ആലപ്പുഴ റിക്രിയേഷൻ മൈതാനത്ത് ഇന്ന് നടക്കും. രാവിലെ 8.40ഓട് കൂടി ചടങ്ങുകൾ ആരംഭിക്കും. രാവിലെ 9 മണിക്ക് പൊതുമരാമത്ത്-രജിസ്ട്രേഷൻ വകുപ്പ് മന്ത്രി ജി സുധാകരൻ ദേശീയ പതാക ഉയർത്തും. തുടർന്ന്, മന്ത്രി റിപ്പബ്ളിക് ദിന സന്ദേശം നൽകും.
കോവിഡ് സാഹചര്യത്തിൽ കർശന മാനദണ്ഡങ്ങൾ പാലിച്ചാണ് ഇക്കുറി റിപ്പബ്ളിക് ദിനാഘോഷം നടക്കുക. പതിവിന് വിപരീതമായി എല്ലാ വർഷവും സംഘടിപ്പിക്കാറുള്ള മാർച്ച് പാസ്റ്റ് ഇക്കുറി ഒഴിവാക്കിയിട്ടുണ്ട്. ചടങ്ങുകളിൽ 100 പേരിൽ താഴെ മാത്രമേ പങ്കെടുപ്പിക്കുകയുളളൂ.
പൊതുജനങ്ങൾക്ക് ചടങ്ങിൽ പ്രവേശനം ഉണ്ടായിരിക്കില്ല. സ്റ്റുഡന്റ് പോലീസ്, സ്കൗട് ആൻഡ് ഗൈഡ്, എൻസിസി ജൂനിയർ വിങ് എന്നിവർ ഇക്കുറി ചടങ്ങിൽ പങ്കെടുക്കില്ല. പോലീസ് ബാൻഡാണ് ദേശീയ ഗാനം ആലപിക്കുക. ലോക്കൽ പോലീസ്, ജില്ലാ സായുധ സേനാംഗങ്ങൾ, എക്സൈസ് തുടങ്ങിയ വിഭാഗങ്ങൾ മാത്രമാണ് പരേഡിൽ സംബന്ധിക്കുക. പരേഡിൽ പങ്കെടുക്കുന്നവരെ തെർമൽ സ്കാനിങ്ങിന് വിധേയരാക്കും. മാസ്ക്, സാനിറ്റൈസർ തുടങ്ങിയ അടിസ്ഥാന സുരക്ഷാ മാനദണ്ഡങ്ങൾ ഉറപ്പാക്കുകയും ചെയ്യും.
Also Read: കർഷക റാലി തടഞ്ഞ് പോലീസ്; നിവേദനം കീറിയെറിഞ്ഞ് ഗവർണർക്ക് എതിരെ പ്രതിഷേധം