പാലക്കാട്: നെൻമാറയിൽ യാത്രക്കാരെ ബസിന് മുകളിലിരുത്തി സർവീസ് നടത്തിയ സംഭവത്തിൽ നടപടിയുമായി മോട്ടോർ വാഹനവകുപ്പ്. നെൻമാറ-വല്ലങ്ങി വെടിക്കെട്ട് കണ്ട് മടങ്ങിയവരെയാണ് ബസിന് മുകളിരുത്തി യാത്ര ചെയ്‌തത്‌. ബസിന് മുകളിൽ നിറയെ യാത്രക്കാരുമായി പോവുകയും, മുകളിൽ കയറി കണ്ടക്‌ടർ ടിക്കറ്റ് നൽകുകയും ചെയ്‌തിരുന്നു.
ഇതിന്റെ ദൃശ്യങ്ങൾ സാമൂഹിക മാദ്ധ്യമങ്ങളിൽ പ്രചരിപ്പിച്ചതോടെയാണ് ‘സന’ ബസ് ഡ്രൈവർ തൗഫീഖ്, കണ്ടക്‌ടർ സസീഖ് കെപി എന്നിവർക്കെതിരെ നടപടി എടുക്കാൻ മോട്ടോർ വാഹനവകുപ്പ് തീരുമാനിച്ചത്. അപകടകരമായ രീതിയിൽ യാത്രക്കാരെ ബസിന്റെ മുകളിൽ കയറ്റി യാത്ര ചെയ്യാൻ അനുവദിച്ചെന്ന് മോട്ടോർ വാഹനവകുപ്പ് കണ്ടെത്തിയതിനെ തുടർന്നാണ് നടപടി. ഡ്രൈവർമാരോട് നേരിട്ട് ഹാജരാവാനും നിർദ്ദേശം നൽകിയിട്ടുണ്ട്.
അതേസമയം, വിഷയത്തിൽ വിശദീകരണവുമായി ബസ് ജീവനക്കാർ രംഗത്തെത്തിയിട്ടുണ്ട്. നിരവധി ബസുകൾ ഇത്തരത്തിൽ സർവീസ് നടത്തിയെന്നും പോലീസ് നടപടി എടുത്തില്ലെന്നും ബസ് ജീവനക്കാർ പറയുന്നു. എന്നാൽ, പലതവണ ആവശ്യപ്പെട്ടിട്ടും യാത്രക്കാർ ഇറങ്ങിയില്ലെന്നും പോലീസുകാർ നിയന്ത്രിച്ചിട്ടും നിൽക്കാത്ത ജനക്കൂട്ടത്തെ എങ്ങനെ നിയന്ത്രിക്കുമെന്നും ബസ് ജീവനക്കാർ ചോദിക്കുന്നു.
Most Read: സിപിഐഎം സംഘടനക്ക് എതിരെ കെഎസ്ഇബി; എംജി സുരേഷിന് സസ്‌പെൻഷൻ
