പത്തനംതിട്ട : മിഥുനമാസത്തിലെ പൂജകൾക്കായി ശബരിമല ക്ഷേത്രനട ഈ മാസം 14ആം തീയതി തുറക്കും. എന്നാൽ സംസ്ഥാനത്ത് നിലവിൽ ലോക്ക്ഡൗൺ നിലനിൽക്കുന്നതിനാൽ ഭക്തർക്ക് പ്രവേശനം ഉണ്ടായിരിക്കില്ലെന്ന് അധികൃതർ വ്യക്തമാക്കി. 14ആം തീയതി വൈകുന്നേരം 5 മണിയോടെയാണ് നട തുറക്കുക. ക്ഷേത്രതന്ത്രി കണ്ഠരര് രാജീവരുടെ മുഖ്യ കാർമ്മികത്വത്തിൽ ക്ഷേത്രം മേൽശാന്തി വികെ ജയരാജ് പോറ്റി ശ്രീകോവിൽ നട തുറന്ന് ദീപങ്ങൾ തെളിക്കും.
ഈ മാസം 15ആം തീയതിയാണ് മിഥുനം ഒന്ന്. നിലവിലെ സാഹചര്യത്തിൽ പതിവ് പൂജകൾ മാത്രമായിരിക്കും ക്ഷേത്രത്തിൽ നടക്കുക. നട തുറക്കുന്ന 14ന് പൂജകൾ ഒന്നും തന്നെ ഉണ്ടാവില്ല. മിഥുന മാസ പൂജകൾക്കായി തുറക്കുന്ന ക്ഷേത്രനട 19ന് രാത്രി 8 മണിക്ക് ഹരിവരാസനം പാടി അടക്കും.
സംസ്ഥാനത്ത് നിലവിൽ കോവിഡ് വ്യാപനം രൂക്ഷമായതിനെ തുടർന്നാണ് ലോക്ക്ഡൗൺ ഏർപ്പെടുത്തിയിരിക്കുന്നത്. ഈ സാഹചര്യത്തിൽ ശബരിമലയിൽ ഭക്തർക്ക് പ്രവേശനം അനുവദിക്കേണ്ടെന്നാണ് തീരുമാനം. കഴിഞ്ഞ വർഷവും ലോക്ക്ഡൗണിനെ തുടർന്ന് ശബരിമലയിൽ ഭക്തർക്ക് പ്രവേശനം അനുവദിച്ചിരുന്നില്ല.
Read also : കേരളത്തിന് പുറത്ത് ഓൺലൈൻ പരീക്ഷ; വലഞ്ഞ് സംസ്ഥാനത്തെ വിദ്യാർഥികൾ