കണ്ണൂർ: തളിപ്പറമ്പ് മയ്യിലിൽ വിദ്യാർഥികളെ ലൈംഗികമായി അതിക്രമിച്ച സിപിഎം പ്രാദേശിക നേതാവിനെതിരെ പോക്‌സോ കേസ്. കുറ്റ്യാട്ടൂർ സിപിഎം ബ്രാഞ്ച് സെക്രട്ടറി പ്രശാന്തിനെതിരെയാണ് പോലീസ് കേസെടുത്തത്. ഇതിന് പിന്നാലെ ഇയാളെ പാർട്ടിയിൽ നിന്ന് പുറത്താക്കിയതായി സിപിഎം അറിയിച്ചു.
രണ്ടര മാസം മുൻപാണ് കേസിനാസ്‌പദമായ സംഭവം നടക്കുന്നത്. വീട്ടിൽ ആളില്ലാത്ത സമയത്ത് എട്ടാം ക്‌ളാസ്‌ വിദ്യാർഥിനിയെ വീട്ടിൽ വിളിച്ചുവരുത്തുകയും ലൈംഗികചുവയോടെ സംസാരിക്കുകയുമായിരുന്നു. പേടിച്ച് വീട്ടിൽ നിന്നിറങ്ങി ഓടിയ പെൺകുട്ടി രക്ഷിതാക്കളോട് കാര്യം പറഞ്ഞു. രണ്ടാഴ്‌ചക്ക് ശേഷം പ്രദേശത്തെ പത്താം ക്‌ളാസ്‌ വിദ്യാർഥിയെയും ഇയാൾ സമാനമായ രീതിയിൽ പീഡിപ്പിക്കാൻ ശ്രമിച്ചു.
പ്രശാന്തിന്റെ അതിക്രമങ്ങൾ അറിഞ്ഞ നാട്ടുകാർ ചൈൽഡ് ലൈനിൽ വിവരമറിയിച്ചു. തുടർന്ന് ചൈൽഡ് ലൈൻ പ്രവർത്തകർ കുട്ടികളുടെ വീട്ടിലെത്തുകയും മൊഴി രേഖപ്പെടുത്തുകയും ചെയ്‌തു. ഇതിന്റെ അടിസ്‌ഥാനത്തിൽ രണ്ട് ദിവസം മുൻപാണ് മയ്യിൽ പോലീസ് പ്രശാന്തിനെതിരെ പോക്‌സോ കേസ് രജിസ്‌റ്റർ ചെയ്‌തത്‌. ഇതോടെ ഇയാൾ ഒളിവിൽ പോയിരിക്കുകയാണ്.
Also Read: ‘ഡെൽറ്റ’; ഇന്ത്യയിൽ കണ്ടെത്തിയ കോവിഡ് വകഭേദത്തിന് പേര് നൽകി ലോകാരോഗ്യ സംഘടന
