മുംബൈ: മഹാരാഷ്ട്രക്കെതിരെ നടത്തിയ പരാമർശങ്ങളിൽ നടി കങ്കണ റണൗട്ട് ആദ്യം മാപ്പു പറയട്ടേയെന്ന് ശിവസേന എംപി സഞ്ജയ് റാവത്ത്. മുംബൈയെ ‘മിനി പാകിസ്ഥാൻ’ എന്നു വിശേഷിപ്പിച്ച കങ്കണക്ക് അഹമ്മദാബാദിനെതിരെ ഇത്തരമൊരു പ്രസ്താവന നടത്താൻ ധൈര്യമുണ്ടോയെന്നും സഞ്ജയ് റാവത്ത് ചോദിച്ചു.
“ആ പെൺകുട്ടി (നടി കങ്കണ റണൗട്ട്) മഹാരാഷ്ട്രയോട് മാപ്പു പറഞ്ഞാൽ, ഞാൻ അതേക്കുറിച്ച് (മാപ്പു പറയുന്നതിനെക്കുറിച്ച്) ചിന്തിക്കും, മുംബൈയെ ‘മിനി പാകിസ്ഥാൻ’ എന്ന് അവർ വിളിച്ചു, ഇതേ കാര്യം അഹമ്മദാബാദിനെക്കുറിച്ച് പറയാൻ അവർക്ക് ധൈര്യമുണ്ടോ?” – റാവത്ത് ചോദിച്ചു.
If that girl (Actor Kangana Ranaut) will apologise to Maharashtra, then I will think about it (of apologising). She calls Mumbai a mini Pakistan. Does she have the courage to say the same about Ahmedabad?: Shiv Sena MP Sanjay Raut pic.twitter.com/GnUBd0ZTFO
— ANI (@ANI) September 6, 2020
നടൻ സുശാന്ത് സിങ് രാജ്പുത്തിന്റെ മരണവുമായി ബന്ധപ്പെട്ട പ്രസ്താവനകളാണ് കങ്കണ റണൗട്ടിനു നേരെയുള്ള പ്രതിഷേധങ്ങൾക്ക് വഴിയൊരുക്കിയത്. നേരത്തെ, സിനിമാ ലോകത്തെ മാഫിയെക്കാൾ താൻ ഭയക്കുന്നത് മുംബൈ പോലീസിനെയാണെന്ന കങ്കണയുടെ പ്രസ്താവനക്കെതിരെ സഞ്ജയ് റാവത്ത് രംഗത്തെത്തിയിരുന്നു.
മുംബൈ പോലീസിനെ അധിക്ഷേപിച്ച നടിയോട് ഇനി മുംബൈയിലേക്ക് മടങ്ങിവരരുതെന്നായിരുന്നു റാവത്ത് പ്രതികരിച്ചത്. ശിവസേന നേതാവിന്റെ പരാമർശം തനിക്കെതിരെയുള്ള ഭീഷണിയായി തോന്നുന്നുവെന്നാണ് കങ്കണ പിന്നീട് ട്വീറ്റിൽ പറഞ്ഞത്. സഞ്ജയ് റാവത്തിന്റെ പത്രപ്രസ്താവനയുടെ ലിങ്ക് അടക്കം പങ്കു വച്ച് കൊണ്ടായിരുന്നു നടി ട്വീറ്റ് ചെയ്തത്. എന്തുകൊണ്ടാണ് മുംബൈ നഗരം പാക് അധിനിവേശ കശ്മീർ പോലെ അനുഭവപ്പെടുന്നതെന്ന ചോദ്യത്തോടെയായിരുന്നു കങ്കണ ട്വീറ്റ് അവസാനിപ്പിച്ചത്.