തിരുവനന്തപുരം : അഭയ കേസുമായി ബന്ധപ്പെട്ട് പ്രതികളുടെ വാദം ഇന്ന് പൂര്‍ത്തിയായി. ഒന്നാം പ്രതിയായ ഫാദര്‍ കോട്ടൂരിന്റെ വാദമാണ് ഇന്ന് പൂര്‍ത്തിയായത്. മൂന്നാം പ്രതിയായ സിസ്‌റ്റര്‍ സെഫിയുടെ വാദം ഇന്നലെ പൂര്‍ത്തിയായിരുന്നു. ഒന്നാം പ്രതിയായ ഫാദര്‍ കോട്ടൂര്‍ താന്‍ നിരപരാധിയാണെന്ന് കോടതിയില്‍ ആവര്‍ത്തിച്ചു.
കേസില്‍ തന്നെ ഒന്നാം പ്രതി ആക്കിയിരിക്കുന്നത് കെട്ടിച്ചമച്ച കഥയുടെ അടിസ്‌ഥാനത്തില്‍ ആണെന്നാണ് കോട്ടൂര്‍ കോടതിയില്‍ വ്യക്‌തമാക്കിയത്. അതിനാല്‍ തന്നെ താന്‍ നിരപരാധിയാണെന്ന് ഫാദര്‍ കോട്ടൂര്‍ കോടതിക്ക് മുന്നില്‍ ആവര്‍ത്തിച്ചു. കൂടാതെ സിസ്‌റ്റര്‍ അഭയ കൊല്ലപ്പെട്ട ദിവസം പുലര്‍ച്ചെ കോണ്‍വെന്റിന് സമീപത്തു വച്ച് പ്രതികളെ കണ്ടെന്ന മൊഴി തെറ്റാണെന്ന് പ്രതിഭാഗം അഭിഭാഷകനും കോടതിയില്‍ വാദിച്ചു.
അഭയ കേസില്‍ മൂന്നാം സാക്ഷിയായ രാജുവാണ് സംഭവദിവസം പ്രതികളെ കോണ്‍വെന്റിന് സമീപം കണ്ടതായി മൊഴി നല്‍കിയത്. സിസ്‌റ്റര്‍ അഭയ കൊല്ലപ്പെട്ടതാണെങ്കിലും ഫാദര്‍ കോട്ടൂര്‍ ഉള്‍പ്പെടുന്ന ആളുകളല്ല പ്രതികളെന്നും, അഭയയെ കൊലപ്പെടുത്തിയത് മറ്റാരോ ആണെന്നുമാണ് കേസില്‍ പ്രതിഭാഗം കോടതിയില്‍ വ്യക്‌തമാക്കിയത്. കേസില്‍ പ്രതികളുടെ വാദം ഇന്ന് പൂര്‍ത്തിയായ സാഹചര്യത്തില്‍ നാളെ പ്രോസിക്യൂഷന്‍ ഇവക്ക് മറുപടി നല്‍കും.
Read also : ഹിത പരിശോധനക്ക് ബിപ്ളബ്; റദ്ദാക്കണമെന്ന് ബിജെപി നേതൃത്വം
