ദുൽഖർ സൽമാൻ നായകനായി എത്തുന്ന പുതിയ തെലുങ്ക് ചിത്രത്തിന്റെ ടൈറ്റിൽ പുറത്തുവിട്ടു. ‘സീതാ രാമം’ എന്നാണ് സിനിമയുടെ പേര്. ടൈറ്റിൽ റിലീസിനൊപ്പം ചിത്രത്തിന്റെ ഒരു വീഡിയോയും അണിയറ പ്രവർത്തകർ പങ്കുവെച്ചിട്ടുണ്ട്.
ഹാനു രാഘവപുഡിയാണ് ഈ ബിഗ് ബജറ്റ് ചിത്രത്തിന്റെ സംവിധായകൻ. ‘മഹാനടി’ നിര്‍മിച്ച സ്വപ്‌ന മൂവീസും വൈജയന്തി ഫിലിംസും ചേര്‍ന്ന് നിർമാണം നിർവഹിക്കുന്ന ചിത്രത്തിൽ മൃണാൽ ഠാക്കൂറും രശ്‌മിക മന്ദാനയുമാണ് നായികമാർ.
ലെഫ്റ്റനന്റ് റാം എന്ന കഥാപാത്രത്തെയാണ് ദുല്‍ഖര്‍ ചിത്രത്തില്‍ അവതരിപ്പിക്കുന്നത്. 1960കളിൽ ജമ്മുകശ്‌മീരിൽ നടന്ന ഒരു പ്രണയ കഥയാണ് ചിത്രം പറയുന്നത്. കശ്‌മീരില്‍ വെച്ചാണ് ചിത്രത്തിന്റെ ഭൂരിഭാഗം ചിത്രീകരണവും പൂര്‍ത്തിയാക്കിയതെന്ന് അണിയറ പ്രവര്‍ത്തകര്‍ അറിയിച്ചിരുന്നു.
തെലുങ്ക്, തമിഴ്, മലയാളം എന്നീ ഭാഷകളിലാണ് ചിത്രം പ്രേക്ഷകർക്കരികിൽ എത്തുക. പിഎസ് വിനോദ് ഛായാഗ്രഹണം നിർവഹിക്കുന്ന ചിത്രത്തിന് ഈണം പകരുന്നത് വിശാൽ ചന്ദ്രശേഖർ ആണ്.
Most Read: അധികാര കസേരയിൽ നിന്ന് ഇമ്രാൻ പുറത്തേക്ക്; ഷെഹബാസ് ആകുമോ പിൻഗാമി
