ന്യൂഡെൽഹി: രാജ്യത്തെ ഏറ്റവും വിലകുറഞ്ഞ കോവിഡ് വാക്സിനാവാൻ ബയോളജിക്കൽ ഇയുടെ കോർബേവാക്‌സ് ഒരുങ്ങുന്നു. വാക്സിന്റെ ഒരു ഡോസിന് 250 രൂപ മാത്രമാണ് വില എന്നാണ് റിപ്പോർട്ടുകൾ. രണ്ട് ഡോസുകളുള്ള വാക്‌സിന് 500 രൂപ മാത്രമേ വിലയാവുകയുള്ളു. വാക്സിൻ നിലവിൽ മൂന്നാംഘട്ട പരീക്ഷണത്തിലാണ്. വൈകാതെ ഇതിന് അടിയന്തര ഉപയോഗത്തിനുള്ള അനുമതി ലഭിക്കുമെന്നാണ് പ്രതീക്ഷിക്കുന്നത്.
അതേസമയം, കോർബേവാക്സിന് രണ്ട് ഡോസുകൾക്ക് 400 രൂപയിൽ താഴെയായിരിക്കും വിലയെന്ന റിപ്പോർട്ടുകളും പുറത്തുവരുന്നുണ്ട്. അംഗീകാരം ലഭിക്കുന്നതിന് മുമ്പ് തന്നെ വാക്സിന്റെ 30 കോടി ഡോസുകൾക്ക് കേന്ദ്രസർക്കാർ ഓർഡർ നൽകിയിട്ടുണ്ട്. വാക്സിന്റെ ആദ്യ രണ്ട് ഘട്ട ക്‌ളിനിക്കൽ ട്രയലുകളും വിജയകരമായിരുന്നു. അടുത്ത ഏതാനും മാസങ്ങൾക്കുള്ളിൽ വാക്സിൻ വിപണിയിലെത്തുമെന്നാണ് പ്രതീക്ഷിക്കുന്നത്.
സെറം ഇൻസ്റ്റിറ്റ്യൂട്ട് നിർമ്മിക്കുന്ന കോവിഷീൽഡ് വാക്സിന്റെ രണ്ട് ഡോസുകൾ സംസ്‌ഥാന സർക്കാരിന് 600 രൂപക്കും സ്വകാര്യ ആശുപത്രികൾക്ക് 1,200 രൂപക്കുമാണ് നൽകുന്നത്. ഭാരത് ബയോടെക്കിന്റെ കോവാക്സിൻ 800 രൂപക്കും 2,400 രൂപക്കുമാണ് നൽകുന്നത്. സ്പുട്നിക് വാക്സിന്റെ ഒരു ഡോസിന് 995 രൂപയാണ് വില.
Also Read: തിരഞ്ഞെടുപ്പ് മറയാക്കി ഹെലികോപ്റ്ററില്‍ പണം കടത്തി; സുരേന്ദ്രനെതിരെ കെ മുരളീധരൻ
