തിരുവനന്തപുരം: തദ്ദേശ തിരഞ്ഞെടുപ്പിൽ ഇടതുമുന്നണിക്ക് ഉണ്ടായ നേട്ടത്തിൽ ജനങ്ങൾക്ക് നന്ദി പറഞ്ഞ് സിപിഎം സംസ്‌ഥാന സെക്രട്ടറി എ വിജയരാഘവൻ. “സർക്കാരിന്റെ മികച്ച പ്രവർത്തനത്തിനുള്ള പിന്തുണയാണ് തദ്ദേശ ഭരണ തിരഞ്ഞെടുപ്പിലെ ജനവിധി. ജനങ്ങൾക്കു വേണ്ടിയുള്ള കരുതൽ ഒരിക്കലും മാറ്റി വച്ചില്ല. സർക്കാർ വലിയ പ്രയാസമുള്ള ഒരു കാലഘട്ടത്തെയാണ് അഭിമുഖീകരിച്ചത്,”- അദ്ദേഹം പറഞ്ഞു.
“ഇടതുമുന്നണിക്ക് കേരളത്തിലെ ജനങ്ങൾ നൽകിയ പിന്തുണക്ക് കൃതജ്‌ഞത രേഖപ്പെടുത്തുന്നു. തെറ്റായ രാഷ്‌ട്രീയ കൂട്ടുകെട്ട് ഉണ്ടാക്കിയാണ് യുഡിഎഫ് തെരഞ്ഞെടുപ്പിനെ നേരിട്ടത്. കോൺഗ്രസ്, ബിജെപി മതമൗലിക വാദികൾ കൂട്ടായാണ് സർക്കാരിനെതിരെ നീങ്ങിയത്. ജനങ്ങൾ ശരിയായ മൂല്യങ്ങൾക്കൊപ്പം നിന്നു. നാടിന്റെ നൻമയെ തകർക്കാനുള്ള ശ്രമത്തെ തോൽപ്പിച്ചത് ജനങ്ങളാണ്,”- വിജയരാഘവൻ പ്രതികരിച്ചു.
തിരുവനന്തപുരം കോർപ്പറേഷനിൽ പല വാർഡുകളിലും ബിജെപിക്ക് യുഡിഎഫ് വോട്ടുകൾ നൽകി. ഓരോ വാർഡും പരിശോധിച്ചാൽ അത് വ്യക്‌തമാകുമെന്നും നെടുങ്കാട് വാർഡിൽ അത് പ്രകടമാണെന്നും എ വിജയരാഘവൻ ആരോപിച്ചു. വെൽഫയർ പാർട്ടി പോലെ തീവ്രമതമൗലിക വാദമുയർത്തുന്ന പാർട്ടിയുമായി യുഡിഎഫ് സഖ്യമുണ്ടാക്കി. തീവ്ര ഇടതു വിരോധം വച്ച് ലീഗിനു വേണ്ടിയാണ് കോൺഗ്രസ് പ്രവർത്തിച്ചതെന്നും അദ്ദേഹം കുറ്റപ്പെടുത്തി.
Also Read: കണ്ണൂർ കോർപ്പറേഷൻ യുഡിഎഫിന് സ്വന്തം; ഇടതുമുന്നണിക്ക് തിരിച്ചടി
