കീവ്: രാജ്യം മുഴുവൻ യുദ്ധഭീതി പരക്കുമ്പോഴും, വെടിയൊച്ചകളും മിസൈൽ ആക്രമണങ്ങളും ഷെല്ലാക്രമങ്ങളും നടക്കുമ്പോഴും യുക്രൈൻ ജനതയുടെ ഉള്ളിൽ ഇപ്പോഴും പ്രതീക്ഷയുണ്ട്. ശാന്തിയും സമാധാനവും നിറഞ്ഞ പഴയ കാലത്തിലേക്ക് അധികം വൈകാതെ ഒരു തിരിച്ചുപോക്ക് ഉണ്ടാകുമെന്ന പ്രതീക്ഷ. നഷ്ടപ്പെടുന്നതിനേക്കാൾ വരാനിരിക്കുന്ന നല്ല ദിനങ്ങളാണ് അവരുടെ മനസിലുള്ളത്.
അതുകൊണ്ടായിരിക്കും പുറത്ത് യുദ്ധം രൂക്ഷമായി തുടരുമ്പോഴും ഇനിയുള്ള ജീവിതം ജീവിച്ചു തീർക്കാൻ നടാലിയയെ ഒപ്പം കൂട്ടാൻ ക്ളെവെറ്റ്സ് തീരുമാനിച്ചത്. ജീവൻ രക്ഷിക്കാൻ അവർ അഭയം തേടിയ ബങ്കറിനുള്ളിൽ വച്ചുതന്നെ ഇരുവരും വിവാഹിതരായി.
യുക്രൈനിലെ ഒഡേസ നഗരത്തിലാണ് ഈ അപൂർവ വിവാഹം നടന്നത്. രാജ്യത്ത് അധിനിവേശം ആരംഭിച്ച റഷ്യൻ സൈന്യം രാജ്യത്തിന്റെ വിവിധ ഭാഗങ്ങളിൽ മിസൈൽ ആക്രമണങ്ങളും ഷെല്ലാക്രമണവും തുടരുന്നതിനിടയിലും ഇരുവരും തങ്ങളുടെ പ്രിയപ്പെട്ടവരുടെ സാന്നിധ്യത്തിൽ തന്നെ വിവാഹ സ്വപ്നം സാക്ഷാത്കരിച്ചു.
ഒരു ബെലാറഷ്യൻ മാദ്ധ്യമ സ്ഥാപനം വിവാഹ ചടങ്ങിന്റെ ചിത്രങ്ങൾ പുറത്തുവിട്ടു. ദമ്പതികൾ വിവാഹ രജിസ്റ്ററിൽ ഒപ്പിടുന്നതും, പൂക്കൾ പിടിച്ചു നിൽക്കുന്ന വധുവും വരനും ചുറ്റുമുള്ളവർക്ക് റൊട്ടി പങ്കിട്ട് സന്തോഷം പങ്കുവെക്കുന്നതും ചിത്രത്തിൽ കാണാം. വരൻ യൂണിഫോമിലും വധു സാധാരണ വേഷത്തിലുമാണ്. വിവാഹ രജിസ്റ്ററിൽ ഒപ്പിട്ടതിന് ശേഷം വധൂവരൻമാർ പരസ്പരം ആലിംഗനം ചെയ്യുകയും ചുംബിക്കുകയും ചെയ്തു. ചുറ്റും നിന്നവർ ഇരുവർക്കും ആശംസകൾ നേർന്നു.
Most Read: ന്യൂസിലാൻഡ് തീരത്ത് പ്രേത സ്രാവ്! കൗതുകവും ഭയവും തോന്നുന്നെന്ന് സോഷ്യൽ മീഡിയ