അബുദാബി : യുഎഇയുടെ വിവിധ ഭാഗങ്ങളിൽ കനത്ത മൂടൽമഞ്ഞ് വ്യാപിച്ചതിനെ തുടർന്ന് വാഹനമോടിക്കുന്ന ആളുകൾക്ക് മുന്നറിയിപ്പുമായി അബുദാബി പോലീസ്. ഞായറാഴ്ച രാവിലെയോടെയാണ് വിവിധ പ്രദേശങ്ങളിൽ മൂടൽമഞ്ഞ് വ്യാപിച്ചു തുടങ്ങിയത്. ഇതോടെ ദൂരക്കാഴ്ചക്ക് തടസം നേരിടുന്നതിനാൽ പ്രധാന റോഡുകളിലെല്ലാം വാഹനങ്ങളുടെ വേഗത മണിക്കൂറിൽ 80 കിലോമീറ്റർ ആക്കി കുറച്ചെന്ന് പോലീസ് വ്യക്തമാക്കി.
രാവിലെ എട്ടു മണി വരെ തീരപ്രദേശങ്ങളിലും ഉള്പ്രദേശങ്ങളിലും ദൂരക്കാഴ്ചയെ മറക്കുന്ന തരത്തില് മൂടല്മഞ്ഞ് ഉണ്ടാകുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. അതിനാൽ മൂടൽമഞ്ഞ് ഉള്ള സമയങ്ങളിൽ പുതുക്കിയ വേഗതയിൽ വാഹനം ഓടിക്കണമെന്നും അബുദാബി പോലീസ് അറിയിപ്പ് നൽകി. കൂടാതെ സ്മാര്ട് ടവറുകളില് കാണിക്കുന്ന നിര്ദ്ദേശങ്ങള് കർശനമായി പാലിക്കണമെന്നും പോലീസ് ഓര്മ്മപ്പെടുത്തി.
കാലാവസ്ഥ മോശമാകുന്ന സാഹചര്യങ്ങളിൽ അബുദാബിയിലെ റോഡുകളിൽ വേഗപരിധി ഓട്ടോമാറ്റിക് ആയി കുറയും. മൂടല്മഞ്ഞ് ഉള്ളപ്പോള് സുരക്ഷാ നിര്ദ്ദേശങ്ങള് പാലിക്കാതെ വാഹനമോടിക്കുന്നവര്ക്ക് ഫെഡറല് ട്രാഫിക് നിയമ പ്രകാരം 500ദിര്ഹം പിഴയും ഡ്രൈവറുടെ ലൈസന്സില് നാല് ബ്ളാക്ക് പോയിന്റുകളുമാണ് ശിക്ഷ.
Read also : യാസ് ചുഴലിക്കാറ്റ്; മുന്നൊരുക്കങ്ങൾ വിലയിരുത്താൻ പ്രധാനമന്ത്രി ഇന്ന് ചർച്ച നടത്തും