കാസര്‍ഗോഡ്: ജ്വല്ലറി തട്ടിപ്പ് കേസില്‍ ആരോപണം നേരിടുന്ന എംസി കമറുദ്ധീന്‍ എംഎല്‍എക്കെതിരെ കൂടുതല്‍ പരാതികള്‍. ചന്തേര സ്റ്റേഷനില്‍ പുതുതായി രജിസ്റ്റര്‍ ചെയ്‌ത രണ്ട് പരാതികള്‍ അടക്കം ആകെ 53 പരാതികളാണ് ലീഗ് എംഎല്‍എക്ക് എതിരെ പോലീസിന് ലഭിച്ചത്. ഇതില്‍ 13 പരാതികളില്‍ ക്രൈംബ്രാഞ്ച് അന്വേഷണം ആരംഭിച്ചു കഴിഞ്ഞു.
സംഭവം വിവാദമായതോടെ എംഎല്‍എക്കെതിരെ അച്ചടക്ക നടപടിയെടുത്ത് മുഖം രക്ഷിക്കാനുള്ള ശ്രമത്തിലാണ് ലീഗ് നേതൃത്വം. യുഡിഎഫ് ജില്ലാ ചെയര്‍മാന്‍ സ്ഥാനത്തു നിന്ന് കമറുദ്ധീനെ നീക്കിയ സംസ്ഥാന നേതൃത്വം 6 മാസത്തിനുള്ളില്‍ സാമ്പത്തിക ബാധ്യത തീര്‍ക്കാനും നിര്‍ദേശിച്ചിരുന്നു. ഏറെ പരാതികളും ആരോപണങ്ങളും ഉയര്‍ന്ന ശേഷമാണ് ലീഗ് നടപടിയെടുക്കാന്‍ തയ്യാറായത്. നൂറു കോടിയിലധികം രൂപയുടെ തട്ടിപ്പാണ് എംഎല്‍എക്കെതിരെ ആരോപിച്ചിരിക്കുന്നത്. പരാതി നല്‍കിയവരില്‍ ഏറെയും ലീഗ് അനുഭാവികളും നേതാക്കളുടെ ബന്ധുക്കളുമാണ്.
Read Also: എംസി കമറുദ്ദീനെതിരെ സിപിഎം സമരം
