കോഴിക്കോട് : ജില്ലയിലെ ചക്കിട്ടപ്പാറ പഞ്ചായത്തിലെ 11ആം വാർഡിൽ 2 പേർക്ക് ഡെങ്കിപ്പനി സ്‌ഥിരീകരിച്ചു. ഇതേ തുടർന്ന് ആരോഗ്യവകുപ്പ് ജീവനക്കാർ പഞ്ചായത്തിൽ രോഗ പ്രതിരോധ പ്രവർത്തനങ്ങൾ ശക്‌തമാക്കി. രോഗവ്യാപനം ഒഴിവാക്കുന്നതിനായി കൊതുകുകളുടെ വളർച്ചക്ക് സഹായിക്കുന്ന സാഹചര്യങ്ങൾ പരമാവധി ഒഴിവാക്കണമെന്ന് അധികൃതർ നിർദ്ദേശം നൽകിയിട്ടുണ്ട്.
പഞ്ചായത്തിലെ പെരുവണ്ണാമൂഴി കുടുംബാരോഗ്യ കേന്ദ്രത്തിലെ ആരോഗ്യ പ്രവർത്തകർ ഡെങ്കിപ്പനി സ്‌ഥിരീകരിച്ച മേഖലകൾ സന്ദർശിച്ച് ബോധവൽക്കരണം നൽകി തുടങ്ങി. വെള്ളം കെട്ടിക്കിടക്കുന്ന സാഹചര്യങ്ങൾ പരമാവധി ഒഴിവാക്കണമെന്നും, റബർ തോട്ടങ്ങളിലെ ചിരട്ടകൾ, പ്ളാസ്‌റ്റിക് ഷീറ്റുകൾ എന്നിവ എടുത്ത് മാറ്റണമെന്നും അധികൃതർ നിർദ്ദേശം നൽകി.
പെരുവണ്ണാമൂഴി കുടുംബാരോഗ്യ കേന്ദ്രം ജെഎച്ച്ഐമാരായ പി ഉണ്ണിക്കൃഷ്‌ണൻ, ഷിനിത്ത് എന്നിവരാണ് ബോധവൽക്കരണ പരിപാടിക്ക് നേതൃത്വം നൽകിയത്. കൂടാതെ പഞ്ചായത്ത് മേഖലയിൽ ഇന്ന് ജില്ലാ ഡിവിസി യൂണിറ്റ് പ്രതിരോധ നടപടികൾ ശക്‌തമാക്കും.
Read also : മദ്യം പാഴ്‌സൽ വിൽപന ഇന്ന് പുനരാരംഭിക്കും; ബെവ്‌ക്യൂ ടോക്കൺ ആവശ്യമില്ല
