പാരിസ്: യുവേഫ ചാംപ്യന്‍സ് ലീഗില്‍ വമ്പൻമാര്‍ ഇന്ന് കളത്തില്‍. ഇംഗ്ളീഷ് കരുത്തരായ ലിവര്‍പൂള്‍ ലാലിഗ ചാമ്പ്യൻമാരായ അത്‌ലറ്റിക്കോ മാഡ്രിനെ നേരിടും. പിഎസ്‌ജിക്ക് ജര്‍മന്‍ ക്ളബ് ലെപ്‌സിഗാണ് എതിരാളി. മാഞ്ചസ്‌റ്റര്‍ സിറ്റി, റയല്‍ മാഡ്രിഡ്, ഇന്റര്‍ മിലാന്‍ ടീമുകള്‍ക്കും ഇന്ന് മൽസരമുണ്ട്. കഴിഞ്ഞ രണ്ട് കളികളും തോറ്റാണ് ലെപ്‌സിഗ് പിഎസ്‌ജിക്കെതിരെ ഇറങ്ങുന്നത്.
കരുത്തരെ നേരിടുന്നത് സ്വന്തം മൈതാനത്തായത് ജര്‍മന്‍ ക്ളബിന് ആശ്വാസമാണ്. ലോകകപ്പ് യോഗ്യതാ മൽസരങ്ങള്‍ക്ക് ശേഷം തിരിച്ചെത്തിയ സൂപ്പര്‍താരം ലയണല്‍ മെസി ഇന്ന് പിഎസ്‌ജിക്കായി കളിക്കും. നെയ്‌മറിന് പരിക്കേറ്റതിനാല്‍ പകരം ജൂലിയന്‍ ഡ്രാക്‌സ്‌ലര്‍ക്ക് അവസരം നല്‍കിയേക്കും.
ലിവര്‍പൂള്‍ സ്‌പാനിഷ് വമ്പൻമാരായ അത്‌ലറ്റിക്കോ മാഡ്രിഡിനെയാണ് നേരിടുക. കഴിഞ്ഞ 11 മൽസരങ്ങളില്‍ നിന്നായി 33 ഗോളുകളാണ് ക്ളോപ്പിന്റെ ചെമ്പട നേടിയത്. റയല്‍ മാഡ്രിഡിന് ഉക്രേനിയന്‍ ക്ളബായ ഷാക്‌തറാണ് എതിരാളികള്‍. മറ്റൊരു മൽസരത്തിൽ ഷെരീഫ് ഇന്റര്‍ മിലാനെ നേരിടും. കഴിഞ്ഞ കളിയിൽ റയലിനെ അട്ടിമറിച്ച ടീമാണ് ഷെരീഫ്.
Read Also: വെള്ളക്കെട്ടിൽ കെഎസ്ആർടിസി ബസ് ഇറക്കിയ സംഭവം; ഡ്രൈവറുടെ ലൈസൻസ് സസ്‌പെൻഡ്‌ ചെയ്യും
