പാറ്റ്‌ന: പ്ലസ് ടു കഴിഞ്ഞ ഓരോ പെണ്‍കുട്ടികള്‍ക്കും 25000 രൂപയും ഡിഗ്രി കഴിഞ്ഞവര്‍ക്ക് 50000 രൂപയും വെച്ച് നല്‍കുന്ന ധനസഹായം തിരഞ്ഞെടുപ്പിന് ശേഷം നടപ്പിലാക്കുമെന്ന് ബീഹാര്‍ മുഖ്യമന്ത്രി നിതീഷ് കുമാര്‍. അധികാരത്തില്‍ എത്തിയാല്‍ എല്ലാ വാഗ്‌ദാനങ്ങളും നടപ്പിലാക്കുമെന്നും മുഖ്യമന്ത്രി പറഞ്ഞു. ബീഹാര്‍ തെരഞ്ഞെടുപ്പ് പ്രമാണിച്ച് സംസ്‌ഥാനത്തിന്റെ വിവിധ ഇടങ്ങളിലായി വലിയ ക്യാമ്പയിനുകളാണ് നിതീഷ് കുമാറിന്റെ നേതൃത്വത്തില്‍ നടത്തുന്നത്.
ഉന്നത വിദ്യാഭ്യാസത്തിനായി നേരത്തെ വിദ്യാര്‍ത്ഥികള്‍ ബീഹാറില്‍ നിന്ന് മറ്റിടങ്ങളിലേക്ക് പോകുമായിരുന്നു, എന്നാല്‍ ഇപ്പോള്‍ ബീഹാറില്‍ മികച്ച വിദ്യാഭാസ സൗകര്യം ഉണ്ടെന്നും നിരവധി കോളേജുകള്‍ സ്‌ഥാപിക്കാനായെന്നും നിതീഷ് കുമാര്‍ പറഞ്ഞു. സ്‍ത്രീകളുടെ വിദ്യാഭ്യാസം തന്നെയാണ് വികസനത്തിലേക്കുള്ള ചവിട്ടുപടി. വനിതാ ശാക്‌തീകരണത്തിനായി തന്റെ മന്ത്രിസഭ എന്നും പ്രവര്‍ത്തിച്ചിട്ടുണ്ട്, സ്‍ത്രീകള്‍ക്കായി തുടര്‍ന്നും പ്രവര്‍ത്തിക്കുമെന്നും നിതീഷ് കുമാര്‍ പറഞ്ഞു. ലഭിക്കുന്ന വോട്ടുകളെക്കുറിച്ച് ചിന്തിക്കുന്നില്ലെന്നും മറിച്ച് സമൂഹത്തെ സേവിക്കുന്നതില്‍ ശ്രദ്ധ ചെലുത്തുകയാണെന്നും നിതീഷ് കുമാര്‍ വ്യക്‌തമാക്കി.
Read also: കേന്ദ്ര കാര്‍ഷിക മന്ത്രി പങ്കെടുത്തില്ല; ചര്‍ച്ച ബഹിഷ്‌കരിച്ച് കര്‍ഷകര്‍
