ന്യൂയോര്‍ക്ക്: കോവിഡ് ബാധിതരുടെ എണ്ണം ലോകത്ത് 11.16 കോടി പിന്നിട്ടു. മൂന്നര ലക്ഷത്തിലധികം പുതിയ കേസുകളാണ് വിവിധ രാജ്യങ്ങളിലായി റിപ്പോര്‍ട് ചെയ്യപ്പെട്ടത്. രോഗമുക്‌തി നേടിയവരുടെ എണ്ണം എട്ട് കോടി 68 ലക്ഷം കടന്നപ്പോൾ ഇതുവരെ കോവിഡ് ബാധിച്ചു മരണപ്പെട്ടവരുടെ എണ്ണം 24.71 ലക്ഷമായി.
ലോകത്ത് രോഗബാധിതരുടെ എണ്ണത്തിൽ അമേരിക്ക, ഇന്ത്യ, ബ്രസീൽ എന്നീ രാജ്യങ്ങളാണ് ആദ്യ മൂന്ന് സ്‌ഥാനങ്ങളിലുള്ളത്.
രോഗബാധിതരുടെ എണ്ണത്തിലും മരണസംഖ്യയിലും ഒന്നാമതുള്ള അമേരിക്കയില്‍ 2.86 കോടി രോഗബാധിതരാണ് ഉള്ളത്. അരലക്ഷത്തിലധികം പുതിയ കേസുകളാണ് രാജ്യത്ത് റിപ്പോര്‍ട് ചെയ്തത്. മരണസംഖ്യ അഞ്ച് ലക്ഷം പിന്നിട്ടപ്പോൾ 1.88 കോടി പേര്‍ രോഗമുക്‌തി നേടുകയും ചെയ്‌തിട്ടുണ്ട്‌.
അതേസമയം ഇന്ത്യയിൽ 1.09 കോടി കടന്നിരിക്കുകയാണ് കോവിഡ് ബാധിതരുടെ എണ്ണം. നിലവില്‍ ചികിൽസയിൽ കഴിയുന്നത് 1.42 ലക്ഷം പേരാണെന്നാണ് ആരോഗ്യമന്ത്രാലയം പറയുന്നത്. ഇതുവരെ 1.56 ലക്ഷം പേര്‍ മരണപ്പെടുകയും 1.06 കോടി പേര്‍ സുഖം പ്രാപിക്കുകയും ചെയ്‌തു.
ബ്രസീലിലാകട്ടെ, കഴിഞ്ഞ 24 മണിക്കൂറിനിടെ റിപ്പോർട് ചെയ്തത് 1,212 കോവിഡ് മരണങ്ങളാണ്. ഇതോടെ രാജ്യത്ത് ഇതുവരെ കോവിഡ് മൂലം ജീവൻ നഷ്‌ടമായവരുടെ എണ്ണം 245,977 ആയി ഉയർന്നതായി ആരോഗ്യ മന്ത്രാലയം അറിയിച്ചു. 57,472 പുതിയ കേസുകളാണ് ഒരു ദിവസത്തിനിടെ ബ്രസീലിൽ റിപ്പോർട് ചെയ്യപ്പെട്ടത്. 10,139,148 പേർക്കാണ് രാജ്യത്ത് ഇതുവരെ കോവിഡ് രോഗബാധ സ്‌ഥിരീകരിച്ചത്‌.
Read Also: കോവിഡ്; ബ്രസീലിൽ സ്‌ഥിതി രൂക്ഷം, മരണസംഖ്യ 245,000 കവിഞ്ഞു
