കണ്ണൂര്‍ : കണ്ണൂര്‍ ജില്ലയില്‍ നാലാമത്തെ സിന്തറ്റിക് ട്രാക്ക് നിര്‍മ്മിക്കാനൊരുങ്ങുന്നു. പരിയാരം മെഡിക്കല്‍ കോളേജിലാണ് ജില്ലയിലെ തന്നെ നാലാമത്തെ സിന്തറ്റിക്ക് ട്രാക്ക് ഒരുങ്ങുന്നത്. ഖേലോ ഇന്ത്യയുടെ ഭാഗമായാണ് പരിയാരത്ത് ട്രാക്ക് നിര്‍മ്മാണം തുടങ്ങുന്നത്. നിര്‍മ്മാണത്തിനായുള്ള അംഗീകാരം ലഭിച്ചു കഴിഞ്ഞു. 7 കോടി രൂപയാണ് 400 മീറ്റര്‍ സിന്തറ്റിക് ട്രാക്ക് ഉള്‍പ്പെടെയുള്ള പദ്ധതിക്ക് അനുവദിച്ചിരിക്കുന്നത്.
ജില്ലയില്‍ നിലവില്‍ മൂന്ന് സിന്തറ്റിക് ട്രാക്കുകളുണ്ട്. അവയില്‍ ഒരെണ്ണത്തിന്റെ ഉദ്ഘാടനം കഴിഞ്ഞു. ബാക്കിയുള്ള രണ്ടെണ്ണത്തിന്റെ നിര്‍മ്മാണം പുരോഗമിക്കുകയാണ്. കണ്ണൂര്‍ സര്‍വകലാശാലയുടെ ഫിസിക്കല്‍ എഡ്യൂക്കേഷന്‍ സ്ഥിതിചെയ്യുന്ന മങ്ങാട്ടുപറമ്പ ക്യാമ്പസിലാണ് ജില്ലയിലെ ആദ്യ സിന്തറ്റിക് ട്രാക്ക് നിര്‍മ്മിച്ചത്. 2018 നവംബറില്‍ മുഖ്യമന്ത്രി പിണറായി വിജയന്‍ അത് ഉദ്ഘാടനം ചെയ്‌തിരുന്നു. നിലവില്‍ സിന്തറ്റിക് ട്രാക്കിന്റെ നിര്‍മ്മാണം പുരോഗമിക്കുന്നത് കണ്ണൂര്‍ ബ്രണ്ണന്‍ കോളേജിലും തലശ്ശേരി മുനിസിപ്പല്‍ സ്റ്റേഡിയത്തിലുമാണ്.
പരിയാരത്ത് ഒരുങ്ങുന്ന സിന്തറ്റിക് ട്രാക്കിന്റെ നിര്‍മ്മാണ ചുമതല സംസ്ഥാന കായിക വകുപ്പിനായിരിക്കും. എട്ട് ലൈന്‍ സിന്തറ്റിക് ട്രാക്കിനോപ്പം ഫുട്ബോള്‍ മൈതാനം, ജംപിങ് പിറ്റ് എന്നിവയും പദ്ധതിയുടെ ഭാഗമായി നിര്‍മ്മിക്കുന്നുണ്ട്. കോളേജിന്റെ ഉടമസ്ഥതയിലുള്ള 10 ഏക്കര്‍ സ്ഥലത്താണ് നിര്‍മ്മാണ പ്രവര്‍ത്തനങ്ങള്‍ നടക്കുന്നത്.
Read also : ഡെല്‍ഹിയില്‍ വായുമലിനീകരണം പരിശോധിക്കാന്‍ ഉന്നതാധികാര സമിതി
