അബുദാബി: മൃഗസംരക്ഷണത്തിന് പുത്തന്‍ പദ്ധതികള്‍ ആവിഷ്‌കരിച്ച് അബുദാബി. രാജ്യത്തെ തന്നെ ഏറ്റവും വലിയ മൃഗസംരക്ഷണ പദ്ധതിക്കാണ് അബുദാബി രൂപം നല്‍കുന്നത്. പരിസ്ഥിതി ഏജന്‍സിയും നാഷണല്‍ അക്വേറിയവുമാണ് ഈ പദ്ധതിക്കായി ചുക്കാന്‍ പിടിക്കുന്നത്.
പദ്ധതിയുടെ ഭാഗമായി കടല്‍ ജന്തു-ജീവജാലങ്ങള്‍ക്കായി ഉള്ള ഏറ്റവും വിപുലമായ പുനരധിവാസ കേന്ദ്രമാക്കിയിരിക്കയാണ് അല്‍ ക്വാനയിലെ നാഷണല്‍ അക്വേറിയത്തെ. ലോകത്തിന്റെ വിവിധ ഇടങ്ങളില്‍ നിന്നുള്ള മൃഗ ഡോക്ടര്‍മാരുടെ അടക്കം സേവനം അക്വേറിയത്തില്‍ ലഭ്യമാക്കും. കൂടാതെ സ്വാഭാവിക വാസസ്ഥലവും ജന്തുക്കളെ കൊണ്ടുപോകുന്നതിനായി പ്രത്യേക വാഹനങ്ങളും ഇവിടെ ഒരുക്കും. ഇതിനെല്ലാം പുറമെ ജീവജാലങ്ങളെ കുറിച്ച് കൂടുതല്‍ അറിയാനുള്ള അവസരവും കേന്ദ്രത്തില്‍ ഒരുക്കും.
National News: ഗ്രാമീണ ടൂറിസം വികസനത്തിന് ധനസഹായം
വംശനാശഭീഷണി നേരിടുന്ന ജന്തുജാലങ്ങള്‍ക്ക് സംരക്ഷണം നല്‍കുക എന്ന ലക്ഷ്യത്തോടെയാണ് പദ്ധതിക്ക് തുടക്കം കുറിച്ചിരിക്കുന്നത് എന്ന് പരിസ്ഥിതി ഏജന്‍സി സ്‌പെഷ്യലിസ്റ്റ് മൈത ഹമേലി പറഞ്ഞു. വംശനാശ ഭീഷണി നേരിടുന്ന കടലാമകള്‍ക്ക് ഇവിടെ പരിചരണം നല്‍കി വരികയാണെന്നും ഇവയുടെ പരിചരണ രീതികളും കേന്ദ്രം കൈക്കൊള്ളുന്ന നടപടികളും നേരിട്ടുവന്ന് മനസ്സിലാക്കാനും പഠിക്കാനും പൊതുജനങ്ങള്‍ക്ക് അവസരം ഒരുക്കുമെന്നും അവര്‍ പറഞ്ഞു. ഇതിലൂടെ പൊതുജനങ്ങളിലേക്ക് പരിസ്ഥിതി സംരക്ഷണസന്ദേശം നല്‍കാന്‍ കഴിയുമെന്നും മൈത ഹമേലി കൂട്ടിച്ചേര്‍ത്തു. കുട്ടികള്‍ക്കും മുതിര്‍ന്നവര്‍ക്കുമായി പ്രത്യേക പഠനകേന്ദ്രവും ഇതിനായി ഇവിടെയുണ്ട്.
