ഏതൊരു മൽസരവും പാഠം; ഇനിയും തൃശൂർകാർക്കൊപ്പം ഉണ്ടാകുമെന്ന് സുരേഷ് ഗോപി

തൃശൂർ: നിയമസഭാ തിരഞ്ഞെടുപ്പിൽ പരാജയപ്പെട്ടെങ്കിലും തൃശൂർക്കാർക്ക് വേണ്ടി പ്രവർത്തിക്കാനും അവരുടെ ആവശ്യങ്ങൾ നിറവേറ്റാനും മുന്നിൽ തന്നെയുണ്ടാകുമെന്ന് നടൻ സുരേഷ് ഗോപി. ഏതൊരു മൽസരവും ഒരു പാഠമാണെന്നും അദ്ദേഹം പറഞ്ഞു. ഫേസ്ബുക്ക് പോസ്‌റ്റിലൂടെയാണ് സുരേഷ് ഗോപിയുടെ പ്രതികരണം.

“തൃശൂരിന് എന്റെ നന്ദി. എനിക്ക് വോട്ട് നൽകിയ തൃശൂരിലെ പ്രബുദ്ധരായ വോട്ടർമാർക്ക് നന്ദി. നൽകാത്തവർക്കും നന്ദി. ഏതൊരു മൽസരവും ഒരു പാഠമാണ്. ജയമോ പരാജയമോ നോക്കാതെ ഇനിയും തൃശൂർക്കാർക്ക് വേണ്ടി പ്രവർത്തിക്കാനും അവരുടെ ആവശ്യങ്ങൾ നിറവേറ്റാനും ഞാൻ മുന്നിൽ തന്നെയുണ്ടാകും എന്നൊരു ഉറപ്പ് നൽകുന്നു. എല്ലാവരോടും സ്‌നേഹം മാത്രം”, സുരേഷ് ഗോപി ഫേസ്ബുക്കിൽ കുറിച്ചു.

നിയമസഭാ തിരഞ്ഞെടുപ്പിൽ എൻഡിഎ സ്‌ഥാനാർഥിയായി മൽസരിച്ച സുരേഷ് ഗോപി ത്രികോണ മൽസരത്തിൽ പരാജയപ്പെട്ടിരുന്നു. വോട്ടെണ്ണലിന്റെ ഒരു ഘട്ടത്തിൽ ലീഡ് നേടിയ ശേഷമാണ് അദ്ദേഹം മൂന്നാം സ്‌ഥാനത്തേക്ക്‌ പിന്തള്ളപ്പെട്ടത്. എൽഡിഎഫിലെ പി ബാലചന്ദ്രനാണ് ഇവിടെ ജയിച്ചത്. 44,263 വോട്ടുകളാണ് പി ബാലചന്ദ്രൻ നേടിയത്. യുഡിഎഫ് നേതാവ് പത്‌മജ വേണുഗോപാലിന് 43,317 വോട്ടുകളും സുരേഷ് ഗോപിക്ക് 40,457 വോട്ടുകളുമാണ് ലഭിച്ചത്.

Read also: പ്രോട്ടോക്കോൾ ലംഘിച്ച് സിഎസ്‌ഐ വൈദികരുടെ ധ്യാനം; പോലീസ് കേസെടുത്തു