തിരുവനന്തപുരം: കേന്ദ്ര സര്‍ക്കാര്‍ നടപ്പിലാക്കുന്ന അഗ്രഗേറ്റര്‍ ലൈസന്‍സ് സംവിധാനത്തെ സംബന്ധിച്ച് ചര്‍ച്ച നടത്തുന്നതിനായി ഗതാഗത വകുപ്പു മന്ത്രി എകെ ശശീന്ദ്രന്‍ അടിയന്തര ഉന്നതതലയോഗം വിളിച്ചു. ഇതിനൊപ്പം കെഎസ്ആർടിസിയിൽ നടപ്പിലാക്കാൻ ആലോചിക്കുന്ന ക്രൂ ചേഞ്ച് സംവിധാനത്തെ ക്കുറിച്ചും യോഗത്തിൽ ചർച്ച ചെയ്‌തേക്കും.
ഡിസംബര്‍ 4ആം തിയതി രാവിലെ 10.30നാണ് യോഗം വിളിച്ചു ചേര്‍ത്തിട്ടുള്ളത്. കേന്ദ്ര മോട്ടോര്‍ വാഹന നിയമത്തില്‍ കൊണ്ടുവന്ന പുതിയ വ്യവസ്‌ഥ പ്രകാരം രാജ്യ വ്യാപകമായി അഗ്രഗേറ്റർ സംവിധാനം നടപ്പിലാക്കുന്നത് സംസ്‌ഥാനത്തിന്‌ ഏത് രീതിയിൽ ബാധിക്കുമെന്ന് യോഗം ചർച്ച ചെയ്യും.
മറ്റു സംസ്‌ഥാനങ്ങൾ ഇത് നടപ്പിലാക്കുന്നത് പൊതുഗതാഗത മേഖലയെ ദോഷകരമായ രീതിയില്‍ ബാധിക്കുമോ തുടങ്ങിയ വിവിധ പ്രായോഗിക വശങ്ങള്‍ പരിശോധിക്കുമെന്ന് ഗതാഗത വകുപ്പുമന്ത്രി എകെ ശശീന്ദ്രന്‍ അറിയിച്ചു.
എറണാകുളം പാലാരിവട്ടത്ത് കഴിഞ്ഞ ദിവസം നടന്ന ബസ് അപകടത്തിന്റെയും വിവിധ കോടതി വിധികളുടെയും പശ്‌ചാത്തലത്തിൽ കൂടിയാണ് യോഗം വിളിച്ചു ചേര്‍ക്കുന്നത് എന്ന് മന്ത്രി അറിയിച്ചു. ക്രൂ ചേഞ്ച് സംവിധാനവും ഡ്രൈവര്‍ കം കണ്ടക്‌ടർ നിയമനവും സംബന്ധിച്ച് യോഗത്തിൽ ചർച്ച ചെയ്യും.
