കൊച്ചി: എആര്‍ നഗര്‍ സഹകരണ ബാങ്കിലെ ക്രമക്കേടുകളെ കുറിച്ചുള്ള വകുപ്പുതല അന്വേഷണം തുടരാമെന്ന് ഹൈക്കോടതി. വകുപ്പുതല അന്വേഷണം നടത്താനുള്ള ഉത്തരവ് ചോദ്യം ചെയ്‌ത്‌ ബാങ്ക് സമര്‍പ്പിച്ച ഹരജി ഹൈക്കോടതി തള്ളി.
അന്വേഷണം തുടരുന്നതില്‍ തടസമില്ലെന്ന് ചൂണ്ടിക്കാട്ടിയ കോടതി അന്വേഷണം നടത്താന്‍ സഹകരണ വകുപ്പ് സ്വീകരിച്ച നടപടികളില്‍ അപാകതയില്ലെന്നും വ്യക്‌തമാക്കി.
വ്യാജ അക്കൗണ്ടുകളും ക്രമവിരുദ്ധ ഇടപാടുകളും കണ്ടെത്തിയതിനെ തുടര്‍ന്നാണ് ജോയിന്റ് രജിസ്‌ട്രാര്‍ അന്വേഷണത്തിന് ഉത്തരവിട്ടത്. ജോയിന്റ് രജിസ്‌ട്രാര്‍ നേരിട്ട് പരിശോധന നടത്തിയില്ലെന്ന് ആരോപിച്ചായിരുന്നു ബാങ്ക് ഹരജി സമർപ്പിച്ചത്. എന്നാല്‍ രേഖകള്‍ പരിശോധിച്ചതില്‍നിന്നും ബാങ്കില്‍ ജോയിന്റ് രജിസ്‌ട്രാര്‍ നേരിട്ടെത്തി പരിശോധന നടത്തിയെന്ന് വ്യക്‌തമായതായി കോടതി അറിയിച്ചു.
അതേസമയം ബാങ്കില്‍ വകുപ്പുതല അന്വേഷണത്തിന് ഏര്‍പ്പെടുത്തിയ സ്‌റ്റേ കോടതി നീക്കി. 2019ലാണ് വകുപ്പുതല അന്വേഷണം കോടതി സ്‌റ്റേ ചെയ്‌തത്‌.
വ്യാപക ക്രമക്കേടുകള്‍ നടന്ന മലപ്പുറം എആര്‍ നഗര്‍ സഹകരണ ബാങ്കിനെതിരെ നിരവധി ഇടപാടുകാരാണ് പരാതിയുമായി രംഗത്തെത്തിയിരുന്നത്. ബാങ്കിൽ 110 കോടി രൂപയുടെ അനധികൃത നിക്ഷേപം ആണ് കണ്ടെത്തിയത്. പത്ത് വർഷത്തിനിടെ ബാങ്കിൽ നടത്തിയത് 1000 കോടിയോളം രൂപയുടെ ഇടപാടുകളെന്നും കണ്ടെത്തിയിരുന്നു. മരണപ്പെട്ടവരുടെ പേരിലും അനധികൃത നിക്ഷേപം കണ്ടെത്തിയിട്ടുണ്ട്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
