മുംബൈ: ആത്മഹത്യ പ്രേരണ കേസില് അറസ്റ്റിലായ റിപ്പബ്ളിക് ടിവി എഡിറ്റര് അര്ണബ് ഗോസ്വാമിക്ക് ജാമ്യം അനുവദിച്ചില്ല. അത്യാവശ്യമെങ്കില് സെഷന്സ് കോടതിയെ സമീപിക്കാമെന്ന് മഹാരാഷ്ട്ര ഹൈക്കോടതി അറിയിച്ചു. അതേസമയം എഫ്ഐആര് റദ്ദാക്കണമെന്ന അര്ണബ് ഉള്പ്പടെയുള്ള പ്രതികളുടെ ഹരജി വിധിപറയാന് മാറ്റി.
കോണ്കോര്ഡ് ഡിസൈന് പ്രൈവറ്റ് ലിമിറ്റഡ് എംഡി അന്വയ് നായിക്കും അമ്മയും 2018ല് ആത്മഹത്യ ചെയ്ത കേസിലാണ് അര്ണബിനെ അറസ്റ്റ് ചെയ്തത്. അഞ്ചര കോടി രൂപയുടെ ബാധ്യതയാണ് അര്ണബുമായുള്ള ഇടപാടില് അന്വയ് നായിക്കിനുണ്ടായത്. അര്ണബ് ഉള്പ്പടെ മൂന്ന് പേരെയാണ് ആത്മഹത്യാ പ്രേരണ കുറ്റത്തിന് അറസ്റ്റ് ചെയ്തത്. മുംബൈയില് നിന്ന് അറസ്റ്റ് ചെയ്ത അര്ണബിനെ 14 ദിവസത്തെ ജുഡീഷ്യല് കസ്റ്റഡിയില് വിടുകയായിരുന്നു.
Read Also: ലാവ്ലിന് കേസ്; ഹരജികള് ഡിസംബര് 3ന് സുപ്രീം കോടതി പരിഗണിക്കും
കേസ് പരിഗണിക്കാന് വേണ്ടിയാണ് കോടതിയുടെ ദീപാവലി അവധി ആരംഭിച്ച സാഹചര്യത്തിലും പ്രത്യേക സിറ്റിങ് നടത്തിയത്. അതേസമയം കസ്റ്റഡി നിഷേധിച്ച മജിസ്ട്രേറ്റ് കോടതി ഉത്തരവിനെതിരെ പോലീസ് നല്കിയ പുനപരിശോധനാ ഹരജി ചൊവ്വാഴ്ച അലിബാഗ് മജിസ്ട്രേറ്റ് കോടതി പരിഗണിക്കും. ഇതിന് ശേഷം മാത്രമാകും അര്ണബ് സെഷന്സ് കോടതിയില് പോകുക. അലിബാഗിലെ പ്രത്യേക ജയിലിലാണ് നിലവില് അര്ണബ് ഉള്ളത്.