കൊച്ചി : സ്വപ്ന സുരേഷ് അടക്കമുള്ള സ്വര്ണ്ണക്കടത്ത് കേസിലെ പ്രതികളുടെ ജാമ്യാപേക്ഷ പരിഗണിക്കുന്നത് വ്യാഴാഴ്ചത്തേക്ക് മാറ്റി വച്ചു. എന്ഐഎ കോടതിയാണ് സ്വപ്ന അടക്കമുള്ള പത്ത് പ്രതികളുടെ ജാമ്യാപേക്ഷ പരിഗണിക്കുന്നത്. കേസുമായി ബന്ധപ്പെട്ട ഡിജിറ്റല് തെളിവുകള് കിട്ടാനുണ്ടെന്ന് അന്വേഷണ സംഘം കോടതിയില് വാദിച്ചതിനെ തുടര്ന്നാണ് ജാമ്യാപേക്ഷ പരിഗണിക്കുന്നത് നീട്ടി വെക്കാന് കോടതി തീരുമാനിച്ചത്. സ്വപ്ന അടക്കമുള്ള പ്രതികളുടെ ജാമ്യാപേക്ഷ ഇന്നായിരുന്നു പരിഗണിക്കേണ്ടിയിരുന്നത്.
അറസ്റ്റിലാകുന്നതിന് മുന്പ് ഭാവിയില് സ്വര്ണ്ണക്കടത്ത് നടത്താനായി പ്രതികള് പദ്ധതികള് തയ്യാറാക്കിയിരുന്നു എന്നും ഇതുമായി ബന്ധപ്പെട്ട ഡിജിറ്റല് തെളിവുകള് ലഭിച്ചിട്ടുണ്ടെന്നും എന്ഐഎ കോടതിയില് അറിയിച്ചു. ഇവയുടെ രേഖകള് ഹാജരാക്കാന് ഇനിയും സമയം എടുക്കുമെന്നും അതിനാല് ജാമ്യാപേക്ഷ പരിഗണിക്കുന്നത് മാറ്റി വെക്കണമെന്നുമായിരുന്നു എന്ഐഎയുടെ വാദം. അതിനാലാണ് ജാമ്യാപേക്ഷ പരിഗണിക്കുന്നത് വ്യാഴഴ്ചത്തേക്ക് നീട്ടി വെക്കാന് കോടതി തീരുമാനിച്ചത്.
ഇതിനിടയില് അഞ്ച് പ്രതികളുടെ കസ്റ്റഡി വേണമെന്ന് എന്ഐഎ കോടതിയില് ആവശ്യപ്പെട്ടിരുന്നു. അഞ്ച് ദിവസത്തെ കസ്റ്റഡിയാണ് അന്വേഷണ സംഘം ആവശ്യപ്പെട്ടത്. എന്നാല് കോടതി രണ്ട് ദിവസത്തെ കസ്റ്റഡി അനുവദിച്ചു. ശേഷം ഇവരുടെയും ജാമ്യാപേക്ഷ വ്യാഴാഴ്ച പരിഗണിക്കും. അബ്ദു പി ടി, ഷറഫുദീന് കെ ടി, ഹംജത് അലി, മുഹമ്മദ് അലി, മുഹമ്മദ് ഷഫീഖ് എന്നിവരുടെ കസ്റ്റഡിയാണ് കോടതി അനുവദിച്ചിരിക്കുന്നത്.
Read also : സിബിഐ സംഘം ഇന്ന് ഹത്രസ് പെണ്കുട്ടിയുടെ ഗ്രാമം സന്ദര്ശിച്ചേക്കും