ആലപ്പുഴ: ഹരിപ്പാട് കരുവാറ്റ, ടി ബി ജംഗ്ഷനിലെ സര്വീസ് സഹകരണ ബാങ്കില് വന് കവര്ച്ച. ലോക്കര് തകര്ത്ത് അഞ്ചര കിലോ സ്വര്ണവും നാലര ലക്ഷം രൂപയുമാണ് മോഷ്ടിച്ചത്. നാല് ദിവസത്തെ ഓണാവധിക്ക് ശേഷം ഇന്ന് രാവിലെ ബാങ്ക് തുറക്കാനെത്തിയ സെക്രട്ടറിയാണ് മോഷണം നടന്നതായി കണ്ടെത്തിയത്.
പൂട്ടുകള് തകര്ത്ത നിലയില് കണ്ട ഉടനെ തന്നെ പോലീസില് വിവരം അറിയിച്ചു. തുടര്ന്നുണ്ടായ അന്വേഷണത്തില് ജനല് കമ്പി തകര്ത്താണ് മോഷ്ടാക്കള് അകത്ത് കയറിയതെന്ന് വ്യക്തമായി. ഗ്യാസ് കട്ടര് ഉപയോഗിച്ചാണ് സ്വര്ണവും പണവും സൂക്ഷിച്ചിരുന്ന ലോക്കറുകള് തകര്ത്തത്. പണയ ഉരുപ്പടികളാണ് കളവ് പോയത്.
തെളിവ് നശിപ്പിക്കാന് സിസിടിവി ക്യാമറകളുടെ ഹാര്ഡ് ഡിസ്കും മോഷ്ടാക്കള് കൈക്കലാക്കിയിരുന്നു. അതിനാല് കൂടുതല് വിവരങ്ങള് ലഭ്യമായിട്ടില്ല. ബാങ്കിന്റെ സമീപത്തെ കടകളിലെയും വീടുകളിലെയും സിസിടിവി ദൃശ്യങ്ങള് കേന്ദ്രീകരിച്ച് നിലവില് അന്വേഷണം നടക്കുകയാണ്.