തിരുവനന്തപുരം : കോവിഡ് വ്യാപനത്തെ തുടര്‍ന്ന് അടച്ചിട്ടിരുന്ന സംസ്‌ഥാനത്തെ ബാറുകള്‍ നാളെ മുതല്‍ തുറക്കും. ബാറുകള്‍ക്കൊപ്പം തന്നെ കള്ളുഷാപ്പുകളും ബിയര്‍, വൈന്‍ പാര്‍ലറുകളും നാളെ മുതല്‍ തുറക്കാമെന്ന് സര്‍ക്കാര്‍ വ്യക്‌തമാക്കി. ഇത് സംബന്ധിച്ച ഉത്തരവ് പുറത്തിറക്കി. കൂടാതെ ഉത്തരവ് പ്രകാരം ബെവ്ക്യൂ ഔട്‌ലെറ്റുകള്‍ വഴിയുള്ള മദ്യവിതരണം രാത്രി 9 മണി വരെയാക്കാനും തീരുമാനമായിട്ടുണ്ട്.
സംസ്‌ഥാനത്ത് കഴിഞ്ഞ 9 മാസക്കാലമായി ബാറുകള്‍ അടഞ്ഞു കിടക്കുകയായിരുന്നു. അടച്ചിട്ട ബാറുകള്‍ കോവിഡ് പ്രതിസന്ധി നിലനില്‍ക്കുന്ന സാഹചര്യത്തില്‍ നേരത്തെ തന്നെ തുറന്നെങ്കിലും ടേബിള്‍ സര്‍വീസ് അനുവദിക്കാതെ കൗണ്ടറുകള്‍ വഴി മാത്രമാണ് മദ്യം വിതരണം ചെയ്‌തിരുന്നത്. സര്‍ക്കാര്‍ ഉത്തരവ് പ്രകാരം നാളെ മുതല്‍ ബാറുകള്‍ വീണ്ടും തുറക്കുമ്പോള്‍ കര്‍ശനമായും കോവിഡ് മാനദണ്ഡങ്ങള്‍ പാലിക്കണമെന്ന് നിര്‍ദേശം നല്‍കിയിട്ടുണ്ട്.
കോവിഡ് വ്യാപനം കണക്കിലെടുത്ത് ബാറുകളിലെ കൗണ്ടറുകളില്‍ ആളുകള്‍ കൂട്ടം കൂടാന്‍ പാടില്ല, ഒരു ടേബിളില്‍ രണ്ടിൽ കൂടുതൽ പേർ പാടില്ല തുടങ്ങിയ നിബന്ധനകള്‍ സര്‍ക്കാര്‍ മുന്നോട്ട് വെച്ചിട്ടുണ്ട്. ബാറുകള്‍ തുറക്കണമെന്ന ബാറുടമകളുടെ ആവശ്യം എക്‌സൈസ് വകുപ്പ് നേരത്തെ തന്നെ അംഗീകരിച്ചിരുന്നെങ്കിലും സംസ്‌ഥാനത്ത് കോവിഡ് രൂക്ഷമായി തുടരുന്നതിനാല്‍ അനുമതി വൈകുകയായിരുന്നു.
Read also : കൊച്ചി മെട്രോ വീണ്ടും പഴയ സമയക്രമം പാലിക്കും
