ഹൈദരാബാദ്: ഇലക്‌ട്രിക് സ്‌കൂട്ടറിന്റെ ബാറ്ററി പൊട്ടിത്തെറിച്ച് തെലങ്കാനയിലെ നിസാമാബാദിൽ വയോധികൻ മരിച്ചു. രാമസ്വാമി(80) എന്നയാളാണ് മരിച്ചത്. കൂടാതെ ഇയാളുടെ ഭാര്യ കമലമ്മ, മകന്‍ പ്രകാശ്, മരുമകള്‍ കൃഷ്‌ണവേണി എന്നിവര്‍ക്ക് പൊള്ളലേൽക്കുകയും ചെയ്‌തിട്ടുണ്ട്‌. കൂടാതെ സംഭവത്തിൽ സ്‌കൂട്ടർ നിർമാതാക്കൾക്കെതിരെ കേസെടുക്കുകയും ചെയ്‌തിട്ടുണ്ട്‌.
പ്യുവര്‍ ഇവി എന്ന ഇലക്‌ട്രിക് സ്‌കൂട്ടര്‍ നിര്‍മാണ കമ്പനിക്കെതിരെയാണ് പോലീസ് കേസെടുത്തത്. സ്‌കൂട്ടറിന്റെ ബാറ്ററി വീടിനുള്ളിൽ ചാർജ് ചെയ്യുന്നതിനിടെ പൊട്ടിത്തെറിച്ചാണ് അപകടം ഉണ്ടായത്. അതേസമയം ഖേദകരമായ സംഭവമാണ് ഉണ്ടായതെന്നും, കുടുംബത്തിന്റെ ദുഃഖത്തില്‍ അനുശോചനം രേഖപ്പെടുത്തുന്നതായും പ്യുവര്‍ ഇവി അധികൃതര്‍ വ്യക്‌തമാക്കി.
നിലവിൽ ഇലക്‌ട്രിക് വാഹനങ്ങളുടെ ഉപയോഗം സർക്കാർ തന്നെ പ്രോൽസാഹിപ്പിക്കുന്നതിന് ഇടയിലാണ് ഇത്തരത്തിൽ അപകടങ്ങൾ പതിവാകുന്നത്. കഴിഞ്ഞ രണ്ടുമാസത്തിനിടെ നിരവധി അപകടങ്ങളാണ് രാജ്യത്ത് ഉണ്ടായത്. അപകടം വിദഗ്‌ധ സമിതിയെക്കൊണ്ട് അന്വേഷിപ്പിക്കുമെന്നും കുറ്റക്കാര്‍ക്കെതിരെ ശക്‌തമായ നടപടിയെടുക്കുമെന്നും കേന്ദ്ര ഗതാഗത മന്ത്രി ട്വിറ്ററിലൂടെ വ്യക്‌തമാക്കിയിട്ടുണ്ട്‌.
Read also: സിൽവർ ലൈൻ; കല്ലിടലിനെതിരെ കണ്ണൂരിൽ ഇന്നും പ്രതിഷേധം
