കൊയിലാണ്ടി: നഗര സൗന്ദര്യവൽക്കരണ പ്രവൃത്തിയുടെ ഭാഗമായി ഇന്ന് മുതൽ കൊയിലാണ്ടി നഗരത്തിൽ ഗതാഗത നിയന്ത്രണം. ദേശീയ പാത 66ൽ ഇന്റർലോക്ക് ടൈൽ പതിക്കുന്ന പ്രവൃത്തി നടക്കുന്നതിനാലാണ് നിയന്ത്രണം ഏർപ്പെടുത്തിയിരിക്കുന്നത്. ശനിയാഴ്‌ച മുതൽ ജോലി തീരുന്നതുവരെയാണ് ഗതാഗത നിയന്ത്രണം. നഗരസഭാ ചെയർപേഴ്‌സൺ അധ്യക്ഷയായ ട്രാഫിക് അഡ്വൈസറി കമ്മിറ്റി യോഗത്തിലാണ് തീരുമാനം.
ഇന്ന് മുതൽ വടകര ഭാഗത്തു നിന്ന് കോഴിക്കോട് ഭാഗത്തേക്ക് പോകേണ്ട ചെറിയ വാഹനങ്ങൾ ആനക്കുളത്തു നിന്ന് ഇടത്തോട്ട് തിരിഞ്ഞ് മുചുകുന്ന് റോഡിലൂടെ പുളിയഞ്ചേരി, നെല്യാടി റോഡിൽ കടന്ന് വിയ്യൂർ-ഇല്ലത്തു താഴെ വഴി പെരുവട്ടൂർ, റെയിൽവേ മേൽപാലം, കുറുവങ്ങാട് വഴി ചെങ്ങോട്ടുകാവ് ദേശീയപാതയിൽ പ്രവേശിക്കണം.
കോഴിക്കോട് ഭാഗത്തു നിന്ന് വടകര ഭാഗത്തേക്ക് പോകേണ്ട ചെറിയ വാഹനങ്ങൾ അരങ്ങാടത്ത് 14ആം മൈൽ ഇടത്തോട്ട് തിരിഞ്ഞ്, ഹാർബർ ബീച്ച് റോഡ്, പഴയ പോലീസ് സ്‌റ്റേഷൻ റോഡ് (ട്രാഫിക് പോലീസ് സ്‌റ്റേഷൻ) വഴി ദേശീയപാതയിൽ പ്രവേശിച്ച് വടകര ഭാഗത്തേക്ക് പോകണം.
അതുപോലെ കണ്ണൂർ, നാദാപുരം ഭാഗത്തു നിന്നും കോഴിക്കോട് ഭാഗത്തേക്ക് പോകേണ്ട ചെറിയ വാഹനങ്ങൾ കുറ്റ്യാടി, പേരാമ്പ്ര, ഉള്ള്യേരി, അത്തോളി വഴിയിലൂടെ പോകണം.
Malabar News: പട്ടാപ്പകൽ വൻ കവർച്ച; 125 പവനും 65,000 രൂപയും മോഷണം പോയി
