മഞ്ചേശ്വരം: നിയമസഭാ തിരഞ്ഞെടുപ്പിൽ സർക്കാരുണ്ടാക്കാനുളള ഭൂരിപക്ഷം എൻഡിഎക്ക് ലഭിക്കുമെന്ന് ബിജെപി സംസ്‌ഥാന അധ്യക്ഷൻ കെ സുരേന്ദ്രൻ. സർക്കാർ ഉണ്ടാക്കുന്നതിൽ കുറച്ചൊന്നും തങ്ങൾ പ്രതീക്ഷിക്കുന്നില്ലെന്നും സുരേന്ദ്രൻ പറഞ്ഞു.
മഞ്ചേശ്വരത്തും കോന്നിയിലുമടക്കം മികച്ച ഭൂരിപക്ഷം നേടി എൻഡിഎ വിജയിക്കും എന്നതിൽ ഒരു സംശയവുമില്ല. നേമത്ത് എൽഡിഎഫും യുഡിഎഫും ഒരുമിച്ച് നിന്നാൽ പോലും ബിജെപിയെ പരാജയപ്പെടുത്താൻ കഴിയില്ല. പിണറായി വിചാരിച്ചാൽ പോലും എൻഡിഎയുടെ വിജയം തടയാൻ സാധിക്കില്ലെന്നും സുരേന്ദ്രൻ പറഞ്ഞു.
പിണറായി വിജയൻ എന്തോ പ്രതീക്ഷിച്ച് ഇരിക്കുകയാണ്. ഭൂതകാലം അദ്ദേഹത്തെ വേട്ടയാടുകയാണ്. കഴിഞ്ഞ അഞ്ച് കൊല്ലം നടത്തിയ അഴിമതി അദ്ദേഹത്തെ ഭയപ്പെടുത്തുന്നുണ്ട്. അതിനാലാണ് ഇപ്പോൾ ബോംബ് പൊട്ടുമെന്ന പറഞ്ഞ് നടക്കുന്നതെന്നും സുരേന്ദ്രൻ കൂട്ടിച്ചേർത്തു.
അതേസമയം, സംസ്‌ഥാനത്ത്‌ തിരഞ്ഞെടുപ്പ് പ്രചാരണത്തിന് ഇന്ന് തിരശീല വീഴും. അവസാന നിമിഷങ്ങളിലും ആരോപണങ്ങൾക്ക് മൂർച്ച കൂട്ടി പരമാവധി ജനങ്ങളിലേക്ക് എത്തിക്കാനുള്ള ശ്രമത്തിലാണ് മൂന്ന് മുന്നണികളും. രാഹുൽ ഗാന്ധി ഉൾപ്പടെയുള്ള പ്രമുഖരും സംസ്‌ഥാനത്ത്‌ തുടരുന്ന സാഹചര്യത്തിൽ കൊട്ടിക്കലാശം ഇല്ലെങ്കിലും ആവേശകരമായി തന്നെയാകും പ്രചാരണം അവസാനിക്കുക.
Also Read: തിരഞ്ഞെടുപ്പ് സർവേ അണികൾക്ക് ആവേശമായി; യുഡിഎഫിന് അനുകൂല സാഹചര്യം; ഉമ്മൻ ചാണ്ടി
