കണ്ണൂർ: ജില്ലയിലും ബ്ളാക്ക് ഫംഗസ് സ്‌ഥിരീകരിച്ചു. ഉളിക്കൽ പഞ്ചായത്തിൽ കോവിഡ് സ്‌ഥിരീകരിച്ച 87 വയസുള്ള ആൾക്കാണ് ഫംഗസ് ബാധ റിപ്പോർട് ചെയ്‌തത്‌. രോഗിയെ പരിയാരം കണ്ണൂർ മെഡിക്കൽ കോളജിലേക്ക് മാറ്റി. അതേസമയം ആശങ്കയുടെ ആവശ്യമില്ലെന്ന്‌ ആരോഗ്യ വകുപ്പ് അറിയിച്ചു.
പ്രധാനമായും ആരോഗ്യ പ്രശ്‌നങ്ങൾ ഉള്ളവരെ ബാധിക്കുന്ന ഒരുതരം ഫംഗൽ ഇൻഫെക്ഷനാണ് ബ്ളാക്ക് ഫംഗസ്. വായുവിലൂടെയാണ് രോഗാണു ശരീരത്തിലേക്ക് പ്രവേശിക്കുന്നത്. ഈ രോഗം ബാധിക്കുന്നതോടെ ശരീരത്തിലെ പ്രതിരോധ ശേഷി കുറയുകയും, രോഗാണുക്കളെ ഇല്ലാതാക്കാൻ സാധിക്കാതെ വരികയും ചെയ്യുന്നു. ശ്വാസകോശം, മൂക്ക്, മുഖം, തലച്ചോർ എന്നീ അവയവങ്ങളെയാണ് രോഗാണു പ്രധാനമായും ആക്രമിക്കുക.
കണ്ണ്, മൂക്ക് എന്നിവയ്‌ക്ക് ചുറ്റും അനുഭവപ്പെടുന്ന വേദന, ചുവപ്പ് നിറം, കൂടാതെ പനി, തലവേദന, ചുമ, ശ്വാസതടസം, ഛർദിയിൽ രക്‌തത്തിന്റെ അംശം എന്നിവയാണ് രോഗലക്ഷണങ്ങൾ.
അതേസമയം മലയോര മേഖലകളിൽ ഡെങ്കിപ്പനി റിപ്പോർട് ചെയ്യുന്നത് ആശങ്ക ഉയർത്തുന്നുണ്ട്. ഈ സാഹചര്യത്തിൽ ജനങ്ങൾ പരിസരം ശുചീകരിക്കണമെന്നും വെള്ളം കെട്ടി നിൽക്കാനുള്ള സാധ്യതകൾ ഒഴിവാക്കണമെന്നും ആരോഗ്യ വകുപ്പ് നിർദ്ദേശിച്ചു.
Malabar News: മലപ്പുറത്ത് വീട്ടിൽ നിന്ന് 12 പവൻ സ്വർണം കവർന്ന സംഭവം; 16കാരി പിടിയിൽ
