നെല്യാടി: മംഗളൂരു-ബെംഗളൂരു ദേശീയ പാതയിൽ സ്വകാര്യ ബസും ഗുഡ്‌സ്‌ ലോറിയും കൂട്ടിയിടിച്ച് ഇരു വാഹനങ്ങൾക്കും തീ പിടിച്ചു. അപകടത്തിൽ ലോറി ഡ്രൈവർ വെന്തുമരിച്ചു. നെല്യാടിക്ക് സമീപം മണ്ണഗുണ്ടിയിൽ കഴിഞ്ഞ ദിവസം രാത്രി വൈകിയാണ് അപകടം. കുന്താപുരത്ത് നിന്ന് ബെംഗളൂരുവിലേക്ക് പോകുകയായിരുന്ന സ്വകാര്യ ബസും ബെംഗളൂരുവിൽ നിന്ന് മംഗളൂരുവിലേക്ക് വരികയായിരുന്ന ചരക്ക് ലോറിയും തമ്മിലാണ് കൂട്ടിയിടിച്ചത്.
അപകടത്തിൽ ലോറിക്കുള്ളിൽ കുടുങ്ങിയ മൈസൂരു സ്വദേശിയായ ഡ്രൈവർ സന്തോഷ് (27) പൊള്ളലേറ്റ് മരിക്കുകയായിരുന്നു. ബസിലുണ്ടായിരുന്ന യാത്രക്കാർ രക്ഷപെട്ടു. ചില യാത്രക്കാർക്ക് നിസാര പരിക്കേറ്റുവെന്ന് പോലീസ് അറിയിച്ചു. ബസ് പൂർണമായും കത്തി നശിച്ചു. ലോറിയുടെ മുൻഭാഗവും നശിച്ചു. അഗ്‌നിശമന സേനയും പോലീസും ചേർന്നാണ് രക്ഷാപ്രവർത്തനം നടത്തിയത്.
Also Read: അതിതീവ്ര കോവിഡ് വൈറസ്; മഹാരാഷ്‌ട്രയിൽ 2 ജില്ലകളിൽ ലോക്ക്ഡൗൺ
