പാലക്കാട്: ജില്ലയിലെ മുണ്ടൂരിൽ ഇതര സംസ്‌ഥാന തൊഴിലാളികൾ തമ്മിൽ സംഘർഷം. സംഘർഷത്തിൽ ഒരാൾ കൊല്ലപ്പെട്ടു. ഉത്തർപ്രദേശ് സ്വദേശി വാസിം ആണ് മരിച്ചത്. സംഭവത്തിൽ രണ്ടുപേർക്ക് പരിക്കേറ്റിട്ടുണ്ട്. ഇന്നലെ രാവിലെയാണ് മുണ്ടൂരിലെ ഫർണിച്ചർ സ്‌ഥാപനത്തിലെ ജീവനക്കാർ തമ്മിൽ സംഘർഷം ഉണ്ടായത്.
ഒരേ കുടുംബത്തിൽ പെട്ടവർ തമ്മിലാണ് സംഘർഷം ഉണ്ടായത്. പരിക്കേറ്റ വാസിം എന്ന് പേരുള്ള മറ്റൊരു ഇതരസംസ്‌ഥാന തൊഴിലാളിയും വാജിദ് എന്നയാളും ഇപ്പോൾ ആശുപത്രിയിൽ ചികിൽസയിലാണ്. കുടുംബപ്രശ്‌നം സംഘർഷത്തിലേക്കും തുടർന്ന് കൊലപാതകത്തിലേക്കും നീങ്ങിയെന്നാണ് പ്രാഥമിക നിഗമനം.
വാജിദാണ് വാസിമിനെ വെട്ടിയത്. ഇതിന് ശേഷം സ്വയം കഴുത്ത് മുറിക്കാൻ ശ്രമിച്ച വാജിദിനെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചു. ഇയാളുടെ പരിക്കും ഗുരുതരമാണ്. പരിക്കേറ്റ വാസിം തൃശൂർ മെഡിക്കൽ കോളേജിലാണ്. സംഭവത്തിൽ അന്വേഷണം ആരംഭിച്ചിട്ടുണ്ടെന്ന് പോലീസ് അറിയിച്ചു.
Most Read: സംസ്‌ഥാനത്ത് ഇന്ന് ഇടിമിന്നലോട് കൂടിയ ഒറ്റപ്പെട്ട മഴയ്‌ക്ക് സാധ്യത
