പട്ന: കൊറോണ വൈറസ് പോയി എന്ന് പശ്ചിമ ബംഗാൾ ബിജെപി അദ്ധ്യക്ഷൻ ദിലീപ് ഘോഷിന്റെ അവകാശവാദം. ബിജെപി നടത്തുന്ന റാലികൾ തടയാനാണ് മമത ബാനർജി സർക്കാർ സംസ്ഥാനത്ത് ലോക് ഡൗൺ ഏർപ്പെടുത്തുന്നതെന്നും അദ്ദേഹം ആരോപിച്ചു. ഹൂഗ്ളി ജില്ലയിൽ നടന്ന പൊതുജന റാലിയെ അഭിസംബോധന ചെയ്ത് സംസാരിക്കുകയായിരുന്നു ദിലീപ് ഘോഷ്.
“കൊറോണ പോയിട്ടും മമത ബാനർജി സംസ്ഥാനത്ത് ലോക് ഡൗൺ ഏർപ്പെടുത്തുകയാണ്, ബിജെപി റാലികൾ സംഘടിപ്പിക്കുന്നത് തടയുകയാണ് അവരുടെ ലക്ഷ്യം. എന്നാൽ, ആർക്കും ഞങ്ങളെ തടയാൻ കഴിയില്ല. സംസ്ഥാനത്തെ ബഹുഭൂരിപക്ഷവും ബിജെപിയെയാണ് വിശ്വസിക്കുന്നത്. അതുകൊണ്ടാണ് ജനങ്ങൾ നിലവിലെ സർക്കാരിനെതിരെ പ്രതിഷേധം നടത്തുന്നത്”- ദിലീപ് ഘോഷ് പറഞ്ഞു. പ്രധാനമന്ത്രി ആകാനാണ് മമതയുടെ ആഗ്രഹമെങ്കിലും ഇപ്പോഴും മുഖ്യമന്ത്രിയായി തുടരുകയാണെന്നും ദിലീപ് ഘോഷ് പരിഹസിച്ചു.
കഠിനാധ്വാനത്തിലൂടെ ആണ് ബിജെപി സംസ്ഥാനത്തെ ജനങ്ങളുടെ വിശ്വാസം നേടിയെടുത്തത്. 2021ൽ ബിജെപി അധികാരത്തിൽ വന്നാൽ സംസ്ഥാനത്തെ പുരോഗതിയിലേക്ക് നയിക്കുമെന്നും അദ്ദേഹം അവകാശപ്പെട്ടു.