ന്യൂഡെൽഹി: രാജ്യത്ത് പ്രതിദിന കോവിഡ് കേസുകൾ മൂന്ന് ലക്ഷത്തിനടുത്ത് തന്നെ തുടരുന്നു. കഴിഞ്ഞ 24 മണിക്കൂറിൽ രാജ്യത്ത് 2,86,384 പേർക്കാണ് കോവിഡ് സ്ഥിരീകരിച്ചത്. ഇതോടെ പ്രതിദിന കോവിഡ് ടെസ്റ്റ് പോസിറ്റിവിറ്റി നിരക്ക് 16 ശതമാനത്തിൽ നിന്നും 19.5 ശതമാനമായി ഉയർന്നു. അതേസമയം കഴിഞ്ഞ 24 മണിക്കൂറിൽ രാജ്യത്ത് കോവിഡ് മുക്തി നേടിയവരുടെ എണ്ണം 3 ലക്ഷത്തിന് മുകളിലാണ്.
3,06,357 പേർക്കാണ് രാജ്യത്ത് കഴിഞ്ഞ 24 മണിക്കൂറിൽ കോവിഡ് മുക്തി ഉണ്ടായത്. കൂടാതെ രാജ്യത്തിന്റെ വിവിധ ഭാഗങ്ങളിലായി നിലവിൽ കോവിഡ് ബാധിച്ച് ചികിൽസയിൽ കഴിയുന്നവരുടെ എണ്ണം 22,02,472 ആണ്. രോഗബാധ ഉയർന്നു തുടരുന്നതിനൊപ്പം കോവിഡ് മുക്തി നിരക്കിൽ നേരിയ കുറവും ഉണ്ടായിട്ടുണ്ട്. 93.33 ശതമാനമാണ് രാജ്യത്തെ നിലവിലെ കോവിഡ് മുക്തി നിരക്ക്.
കഴിഞ്ഞ 24 മണിക്കൂറിൽ രാജ്യത്ത് 573 പേരാണ് കോവിഡിനെ തുടർന്ന് മരിച്ചത്. നിലവിൽ കോവിഡ് തരംഗത്തിൽ മരിച്ച ആളുകളിൽ 60 ശതമാനം പേരും കോവിഡ് വാക്സിനേഷൻ പൂർണമായോ ഭാഗികമായോ സ്വീകരിക്കാത്തവരാണ്. കൂടാതെ രാജ്യത്ത് ഇതുവരെ കോവിഡ് ബാധിതരായവർ 4.03 കോടിയാണ്. അമേരിക്ക കഴിഞ്ഞാൽ ഏറ്റവും കൂടുതൽ കോവിഡ് ബാധിതരുള്ള രാജ്യമാണ് ഇന്ത്യ.
Read also: കൊടുമണ്ണൂരിലെ സംഘർഷം; പോലീസിനെതിരെ സിപിഐ, പരാതി