തിരുവനന്തപുരം: സംസ്‌ഥാനത്ത് അവധി ദിവസങ്ങളിലും വാക്‌സിനേഷൻ നടത്താൻ നിർദ്ദേശം നൽകി മുഖ്യമന്ത്രി പിണറായി വിജയൻ. കോവിഡ് അവലോകന യോഗത്തിലാണ് അദ്ദേഹം ഇക്കാര്യം നിർദ്ദേശിച്ചത്. കൂടാതെ അവധി ദിവസങ്ങളിൽ നടത്തുന്ന വാക്‌സിനേഷന് അനുബന്ധ രോഗികൾക്കും, ഗർഭിണികൾക്കും മുൻഗണന നൽകാനും അദ്ദേഹം നിർദ്ദേശം നൽകി.
വാക്‌സിനേഷൻ വർധിപ്പിക്കുന്ന സാഹചര്യത്തിൽ സിറിഞ്ച് ക്ഷാമം ഉണ്ടാകാതെ ഇടപെടണമെന്ന് ആരോഗ്യവകുപ്പിനും മുഖ്യമന്ത്രി നിർദ്ദേശം നൽകിയിട്ടുണ്ട്. അനുബന്ധ രോഗങ്ങൾ ഉള്ളവർ കോവിഡ് ബാധിതരായാൽ ഉടൻ ആശുപത്രിയിലെത്തിക്കാൻ തദ്ദേശസ്വയംഭരണ സ്‌ഥാപനങ്ങളും, വാർഡ് സമിതികളും, റാപിഡ്‌ റസ്‌പോൺസ് ടീമുകളും ഉണർന്ന് പ്രവർത്തിക്കണമെന്ന് മുഖ്യമന്ത്രി പറഞ്ഞു.
കൂടാതെ 2 ഡോസ് വാക്‌സിൻ എടുത്ത ആളുകൾക്ക് കോവിഡ് സ്‌ഥിരീകരിച്ച സംഭവം പഠന വിഷയമാക്കാൻ മുഖ്യമന്ത്രി ആരോഗ്യ വകുപ്പിനും, ആരോഗ്യ വിദഗ്‌ധ സമിതിക്കും നിർദ്ദേശം നൽകി. പത്തനംതിട്ട ജില്ലയിൽ 2 ഡോസ് വാക്‌സിനെടുത്ത 124 പേർക്കാണ് കോവിഡ് സ്‌ഥിരീകരിച്ചത്‌. കൂടാതെ ആറൻമുള വള്ളംകളിയുമായി ബന്ധപ്പെട്ട് കഴിഞ്ഞ തവണ നൽകിയ ഇളവുകൾ മാത്രം നൽകിയാൽ മതിയെന്നും യോഗം തീരുമാനിച്ചു.
Read also: കൊച്ചി മെട്രോ എംഡിയായി ലോക്‌നാഥ് ബെഹ്‌റയ്‌ക്ക്‌ നിയമനം
