പാലക്കാട്: ജില്ലയില്‍ കോവിഡ് പോസിറ്റീവ് സാധ്യത 5 മുതല്‍ 7 ശതമാനം വരെയായി ഉയര്‍ന്നതായി പരിശോധനാ റിപ്പോര്‍ട്ട്. അതായത്, 100 പേരെ പരിശോധിച്ചാല്‍ 5 മുതല്‍ 7 പേര്‍ക്ക് വരെ കോവിഡ് പോസിറ്റീവ് ആകാനുള്ള സാധ്യത. നേരത്തെ ഇത് 2 ശതമാനം മാത്രമായിരുന്നു. ഇതേത്തുടര്‍ന്നു കര്‍ശന ജാഗ്രതക്ക് മന്ത്രി എ.കെ.ബാലന്‍ നിര്‍ദേശം നല്‍കി. സമ്പര്‍ക്കം വഴിയാണു പ്രധാനമായും കോവിഡ് പടരുന്നത്. ഇതിന്റെ അടിസ്ഥാനത്തില്‍ നിയന്ത്രണം കടുപ്പിക്കും.
പാലക്കാട്ട് പ്രധാനമായും ജില്ലക്കുള്ളില്‍ നിന്നാണു രോഗവ്യാപനം. അതിനാല്‍ ചെക്‌പോസ്റ്റിലെ ആരോഗ്യ പരിശോധന നിര്‍ത്താന്‍ തീരുമാനിച്ചതായി കലക്ടര്‍ ഡി.ബാലമുരളി അറിയിച്ചു. എന്നാല്‍ ജില്ലാ അതിര്‍ത്തി കടക്കാന്‍ കോവിഡ് ജാഗ്രതാ പോര്‍ട്ടലില്‍ റജിസ്റ്റര്‍ ചെയ്യണം. വ്യാജമദ്യം ഉള്‍പ്പെടെയുള്ള പരിശോധനകള്‍ കര്‍ശനമാക്കാനും മന്ത്രി കെ.കൃഷ്ണന്‍കുട്ടി അവലോകന യോഗത്തില്‍ നിര്‍ദേശിച്ചു.
