ഡെൽഹി: സുപ്രീംകോടതി വിധി വരുന്നതിന് മുമ്പ് യുഡിഎഫും ബിജെപിയും എന്തിനാണ് ശബരിമല വിഷയം ഉന്നയിക്കുന്നതെന്ന് സിപിഐ ജനറൽ സെക്രട്ടറി ഡി രാജ. തിരഞ്ഞെടുപ്പ് സമയത്ത് രാഷ്‌ട്രീയത്തിൽ മതവും വിശ്വാസവും കലർത്താൻ ശ്രമിക്കുന്നത് അപലപനീയമാണെന്നും അദ്ദേഹം പറഞ്ഞു.
കേരളത്തിൽ ഇടത് സർക്കാരിന് തുടർ ഭരണം ഉണ്ടാകുമെന്ന് ഡി രാജ ആത്‌മ വിശ്വാസം പ്രകടിപ്പിച്ചു. മികച്ച പ്രകടനമാണ് ഇടതുസർക്കാർ കാഴ്‌ച വെച്ചതെന്നും ഡി രാജ പറഞ്ഞു. ബിജെപി സ്‌ഥാനാർഥി സന്ദീപ് വചസ്‍പതി പുന്നപ്ര- വയലാർ രക്‌ത സാക്ഷി മണ്ഡപത്തിൽ പുഷ്‌പാർച്ചന നടത്തിയതിനെ കുറിച്ചും ഡി രാജ പ്രതികരിച്ചു.
ബിജെപി സ്‌ഥാനാർഥി രക്‌ത സാക്ഷി സ്‌മാരകത്തിൽ കയറിയത് ലജ്‌ജാകരമാണെന്ന് ആയിരുന്നു രാജയുടെ പ്രതികരണം. പുന്നപ്ര വയലാർ സമരത്തിൽ ആർഎസ്എസിനോ, ജനസംഘത്തിനോ പങ്കില്ലെന്നും രാഷ്‌ട്രീയ നേട്ടത്തിന് വേണ്ടി നടത്തിയ നടപടി ലജ്‌ജാകരമാണെന്നും ഡി രാജ പറഞ്ഞു.
സ്വന്തം നടപടികളിൽ ബിജെപി ലജ്‌ജിക്കണമെന്നും ഇടതുപക്ഷത്തെ ചോദ്യം ചെയ്യാൻ ബിജെപിക്ക് ധാർമിക അവകാശമില്ലെന്നും ഡി രാജ കൂട്ടിച്ചേർത്തു.
Read Also: വാക്‌സിൻ സ്വീകരിച്ചതിന് പിന്നാലെ പാക് പ്രധാനമന്ത്രി ഇമ്രാൻ ഖാന് കോവിഡ്
