ചെന്നൈ: രാജ്യത്ത് കോവിഡ് രോഗവ്യാപനം നിലനില്ക്കുന്ന സാഹചര്യത്തില് തീയേറ്ററുകളില് നൂറു ശതമാനം ആളുകളെ പ്രവേശിപ്പിക്കുന്ന ഉത്തരവ് പിന്വലിക്കണമെന്ന് തമിഴ്നാട് സര്ക്കാരിന് കേന്ദ്ര നിര്ദേശം.
തീയേറ്ററുകളില് നൂറു ശതമാനം പേര്ക്കും പ്രവേശനം നല്കുമെന്ന തമിഴ്നാട് സര്ക്കാറിന്റെ ഉത്തരവിനെതിരെ രോഗവ്യാപനം വര്ധിപ്പിക്കുമെന്ന് കാട്ടി നിരവധി പേര് രംഗത്തെത്തിരുന്നു. അതേസമയം കേരളത്തില് തിയേറ്ററുകള് തുറക്കാനാവില്ലെന്ന് ഫിലിം ചേംബര് അറിയിച്ചിരിക്കുകയാണ്. 50 ശതമാനം ആളുകളെ പ്രവേശിപ്പിച്ച് തീയേറ്ററുകള് തുറക്കാനാവില്ലെന്നാണ് ഫിലിം ചേംബര് പറഞ്ഞത്.
തീയേറ്ററുകള് അടുത്തയാഴ്ച തുറന്ന് പ്രവര്ത്തിക്കുമെന്ന് തീയേറ്റര് ഉടമകളുടെ സംഘടന (ഫിയോക്ക്) കഴിഞ്ഞ ദിവസം പ്രഖ്യാപിച്ചിരുന്നു. എന്നാല് സിനിമകള് വിതരണത്തിന് നല്കില്ലെന്നും തീയറ്ററുകള് തുറക്കാത്തത് സര്ക്കാറിനോടുള്ള പ്രതിഷേധമല്ലെന്നും ഫിലിം ചേംബര് ഭാരവാഹികള് വ്യക്തമാക്കി.
കോവിഡ് നിയന്ത്രണങ്ങള് ലഘൂകരിച്ച സാഹചര്യത്തില് തിയേറ്ററുകള് തുറക്കാനുള്ള അനുമതി സംസ്ഥാന സര്ക്കാര് നല്കിയിരുന്നു. തീയേറ്ററുകള് തുറക്കുന്നതിന്റെ ഭാഗമായി ആരോഗ്യവകുപ്പ് മാര്ഗ നിര്ദേശങ്ങളും പ്രഖ്യാപിച്ചിരുന്നു. തീയേറ്ററുകളില് ഒന്നിടവിട്ട സീറ്റുകളിലേ പ്രവേശനം പാടുള്ളുവെന്നും പ്രവര്ത്തന സമയം രാവിലെ 9 മുതല് രാത്രി ഒന്പതുവരെ മാത്രമായിരിക്കണം എന്നും ആരോഗ്യ വകുപ്പിന്റെ നിര്ദേശങ്ങളില് പറഞ്ഞിരുന്നു.
Read also: വാളയാര് കേസില് നീതി ഉറപ്പാക്കും; മന്ത്രി എകെ ബാലന്