ന്യൂഡെല്‍ഹി: ഫേസ്ബുക്ക് ഇന്ത്യാ മേധാവി അങ്കി ദാസിനെ പാര്‍ലമെന്ററി സമിതി രണ്ട് മണിക്കൂര്‍ ചോദ്യം ചെയ്‌തു. ബി.ജെ.പി നേതാക്കളുടെ വിദ്വേഷ പ്രചാരണങ്ങള്‍ക്കെതിരെ ഫേസ്ബുക്ക് നടപടി എടുക്കുന്നില്ലെന്ന വെളിപ്പെടുത്തലിന്റെ അടിസ്‌ഥാനത്തിലായിരുന്നു ചോദ്യം ചെയ്യല്‍.
അങ്കിദാസിന് പുറമെ ബിസിനസ് വിഭാഗം മേധാവി അജിത്ത് മോഹനും പാര്‍ലമെന്ററി സമിതിക്ക് മുമ്പാകെ ഹാജരായി. വ്യക്‌തികളുടെ ഡാറ്റ സംരക്ഷിക്കുന്നതിനായി സ്വീകരിക്കുന്ന നടപടികളെക്കുറിച്ച് പാര്‍ലമെന്ററി സമിതിയിലെ എം.പിമാര്‍ ഫേസ്ബുക്ക് പ്രതിനിധികളോട് ചോദിച്ചറിഞ്ഞു. ഫേസ്ബുക്കിന്റെ വരുമാനത്തില്‍ എത്ര ശതമാനമാണ് വ്യക്‌തികളുടെ സ്വകാര്യ വിവരങ്ങള്‍ സംരക്ഷിക്കുന്നതിനായി മാറ്റിവെക്കുന്നതെന്നും എം.പിമാര്‍ ചോദിച്ചറിഞ്ഞു.
Also Read: ഡെല്‍ഹിയില്‍ വായുനിലവാരം ഗുരുതര അവസ്‌ഥയിലേക്ക്
അങ്കി ദാസ് വഴി ഇന്ത്യയില്‍ ഫേസ്ബുക്ക് ബി.ജെ.പി അനുകൂല നിലപാട് സ്വീകരിക്കുന്നതായി ‘വാള്‍ സ്ട്രീറ്റ് ജേര്‍ണല്‍’ വെളിപ്പെടുത്തിയിരുന്നു. വിദ്വേഷ പരാമര്‍ശങ്ങള്‍ നടത്തിയിട്ടും ബി.ജെ.പി നേതാവ് രാജാ സിംഗിനെതിരെ നടപടി സ്വീകരിക്കാത്തത് ഉള്‍പ്പെടെ ചൂണ്ടിക്കാട്ടിയാണ് വാള്‍ സ്ട്രീറ്റിന്റെ വെളിപ്പെടുത്തല്‍. ഇതിന്റെ പശ്‌ചാത്തലത്തിലാണ് ഫേസ്ബുക്ക് ഇന്ത്യയുടെ പ്രതിനിധികളെ വിളിച്ചുവരുത്താന്‍ പാര്‍ലമെന്ററി സമിതി തീരുമാനിച്ചത്. നേരത്തെ ഡല്‍ഹി നിയമസഭാ സമിതിയും ഫേസ്ബുക്ക് പ്രതിനിധികള്‍ക്ക് നോട്ടീസ് അയച്ചിരുന്നു.
