ന്യൂഡെൽഹി: രാജ്യത്തെ 6000ത്തിലധികം റെയിൽവേ സ്‌റ്റേഷനുകളിൽ സൗജന്യ വൈഫൈ സേവനം ലഭ്യമാകുമെന്ന് കേന്ദ്ര റെയിൽവേ മന്ത്രി അറിയിച്ചു. ഇന്ത്യയിൽ ഉടനീളമുള്ള 6071 റെയിൽവേ സ്‌റ്റേഷനുകളിൽ ഇപ്പോൾ വൈഫൈ സേവനങ്ങൾ ലഭ്യമാണ്. ഓരോ ദിവസവും ആദ്യ അരമണിക്കൂർ സൗജന്യമായും പിന്നീട് ചാർജ് ഈടാക്കുന്ന രീതിയിലുമാണ് വൈഫൈ പൊതുജനങ്ങൾക്ക് ലഭ്യമാകുന്നത്. ഈ സ്‌റ്റേഷനുകളിലെ മൊത്തം ഡേറ്റ ഉപയോഗം പ്രതിമാസം ഏകദേശം 97.25 ടെറാബൈറ്റ് ആണെന്നും മന്ത്രി പറഞ്ഞു.
വൈഫൈ പദ്ധതിക്കായി റെയിൽവേ മന്ത്രാലയം പ്രത്യേക ഫണ്ടുകളൊന്നും അനുവദിച്ചിട്ടില്ല. ഗ്രാമീണ മേഖലയിലെ 193 റെയിൽവേ സ്‌റ്റേഷനുകളിൽ വൈഫൈ സേവനങ്ങൾ നൽകുന്നതിന് യൂണിവേഴ്‌സൽ സർവീസ് ഒബ്‌ളിഗേഷൻ ഫണ്ടിന് കീഴിൽ 27.22 കോടി രൂപയുടെ ഫണ്ട് ടെലികോം വകുപ്പ് അനുവദിച്ചിട്ടുണ്ട്.
കൂടാതെ, 1287 റെയിൽവേ സ്‌റ്റേഷനുകളിൽ റെയിൽടെൽ കോർപറേഷൻ ഓഫ് ഇന്ത്യ ലിമിറ്റഡ് വൈഫൈ സേവനങ്ങൾ നൽകി വരുന്നുണ്ട്. ശേഷിക്കുന്ന സ്‌റ്റേഷനുകളിൽ മൂലധന ചെലവില്ലാതെ വിവിധ സ്‌ഥാപനങ്ങളുടെ കോർപറേറ്റ് സോഷ്യൽ റെസ്‌പോൺസിബിലിറ്റി സിഎസ്‌ആർ ചാരിറ്റി പ്രോജക്‌ടുകൾ എന്നിവക്ക് കീഴിൽ ഈ സേവനങ്ങൾ നൽകിയിട്ടുണ്ടെന്നും കേന്ദ്ര റെയിൽവേ മന്ത്രി ശ്രീ അശ്വിനി വൈഷ്‌ണവ് വ്യക്‌തമാക്കി.
Also Read: രാജ്യത്ത് 25 വിമാനത്താവളങ്ങള്‍ സ്വകാര്യ വൽകരിക്കുമെന്ന് കേന്ദ്രമന്ത്രി; കോഴിക്കോടും പട്ടികയിൽ
