കോഴിക്കോട്: മുക്കുപണ്ട തട്ടിപ്പ് കേസില് കോഴിക്കോട് കൊടിയത്തൂര് പഞ്ചായത്ത് വൈസ് പ്രസിഡണ്ട് ബാബു പൊലുകുന്നത്ത് പിടിയില്. ഒളിവിലായിരുന്ന ഇയാളെ ബെംഗളൂരുവില് വെച്ചാണ് മുക്കം പോലീസ് പിടികൂടിയത്.
കേരള ഗ്രാമീണ് ബാങ്കില് മുക്കുപണ്ടം പണയം വെച്ച് 27 ലക്ഷം രൂപയുടെ തട്ടിപ്പ് നടത്തിയ സംഭവത്തിലാണ് ബാബു പൊലുകുന്നത്ത് പിടിയിലായത്. കേസില് പ്രതിയായതോടെ ബാബുവിനെ കോണ്ഗ്രസ് നേതൃത്വം സസ്പെന്ഡ് ചെയ്തിരുന്നു.
കേസിൽ ദളിത് കോണ്ഗ്രസ് നേതാവായ വിഷ്ണു, മാട്ടുമുറിക്കല് സന്തോഷ് കുമാര്, സന്തോഷിന്റെ ഭാര്യ ഷൈനി എന്നിവര് നേരത്തെ അറസ്റ്റിലായിരുന്നു. അന്വേഷണം നടക്കുന്നതിനിടെ കഴിഞ്ഞ ദിവസം ബാങ്കിലെ അപ്രൈസര് മുക്കം സ്വദേശി മോഹനന് ട്രെയിനിന് മുന്നില് ചാടി ജീവനൊടുക്കിയിരുന്നു.
വിഷ്ണു പന്തീരാങ്കാവിലെ മറ്റൊരു ബാങ്കില് മുക്കുപണ്ടം പണയം വെക്കാനെത്തിയ ഘട്ടത്തില് സംശയം തോന്നിയ ബാങ്ക് ഉദ്യോഗസ്ഥര് പോലീസിലറിയിക്കുകയും അന്വേഷണം നടത്തുകയുമായിരുന്നു. പിന്നാലെയാണ് കൊടിയത്തൂര് ഗ്രാമീണ ബാങ്കിലെ ലക്ഷങ്ങളുടെ തട്ടിപ്പടക്കം പുറത്ത് വന്നത്. കാര്ഷിക-ഗ്രാമവികസന ബാങ്കിന്റെ അഗസ്ത്യന്മുഴി ശാഖയിലും തട്ടിപ്പ് നടത്തിയിട്ടുണ്ട്.
Most Read: പോലീസ് ക്വാർട്ടേഴ്സിലെ കൂട്ടമരണം; സിപിഒ റെനീസിനെതിരെ പുതിയ കേസ്