ചെന്നൈ: തമിഴ്നാട്ടിൽ അടുത്ത മൂന്ന് ദിവസം കൂടി കനത്ത മഴക്ക് സാധ്യതയുണ്ടെന്ന് വ്യക്തമാക്കി കാലാവസ്ഥാ നിരീക്ഷണ കേന്ദ്രം. 10, 11, 12 എന്നീ തീയതികളിലാണ് അതിതീവ്ര മഴ തുടരുമെന്ന് മുന്നറിയിപ്പ് നൽകിയിരിക്കുന്നത്. കൂടാതെ 16 ജില്ലകളിൽ റെഡ് അലർടും പ്രഖ്യാപിച്ചിട്ടുണ്ട്.
കടലൂർ, രാമനാഥപുരം, ശിവഗംഗ, പുതുക്കോട്ട, തഞ്ചാവൂർ തുടങ്ങിയ 10 തീരദേശ ജില്ലകളിലാണ് നാളെ റെഡ് അലർട് പ്രഖ്യാപിച്ചിരിക്കുന്നത്. കൂടാതെ ചെന്നൈ, തിരുവള്ളൂർ, കാഞ്ചീപുരം, ചെങ്കൽപേട്ട്, തിരുവണ്ണാമലൈ, വിഴിപ്പുരം എന്നീ ജില്ലകളിൽ 11, 12 തീയതികളിലും റെഡ് അലർട് പ്രഖ്യാപിച്ചു. റെഡ് അലർട് പ്രഖ്യാപിച്ച സാഹചര്യത്തിൽ ഈ ജില്ലകളിലെ കോളേജുകൾ ഉൾപ്പടെയുള്ള വിദ്യാഭ്യാസ സ്ഥാപനങ്ങൾക്ക് അടുത്ത ദിവസങ്ങളിൽ അവധി ആയിരിക്കും.
ചെന്നൈയിൽ നിലവിൽ മഴ കുറഞ്ഞെങ്കിലും വെള്ളക്കെട്ട് തുടരുകയാണ്. വെള്ളക്കെട്ട് പരിഹരിക്കുന്നതിൽ കാലതാമസം ഉണ്ടാകുന്നതിനെതിരെ മദ്രാസ് ഹൈക്കോടതി വിമർശനം ഉന്നയിക്കുകയും ചെയ്തു. കൂടാതെ ഒരാഴ്ചക്കുള്ളിൽ കൃത്യമായ നടപടി സ്വീകരിച്ചില്ലെങ്കിൽ സ്വമേധയാ കേസെടുക്കുമെന്നും കോടതി വ്യക്തമാക്കി. അതേസമയം മുൻകരുതലിന്റെ ഭാഗമായി ആരക്കോണത്ത് നിന്നും ദുരന്ത നിവാരണ സേനാ സംഘം ഇന്ന് രാത്രിയോടെ ചെന്നൈയിൽ എത്തും.
Read also: പിഎം കെയർ: കശ്മീരിന് ലഭിച്ച വെന്റിലേറ്ററുകള് പ്രവര്ത്തന ക്ഷമമല്ല; റിപ്പോര്ട്