തിരുവനന്തപുരം : നിയമസഭാ കയ്യാങ്കളി കേസ് റദ്ദാക്കണമെന്ന് ആവശ്യപ്പെട്ട് സംസ്ഥാന സര്ക്കാര് ഹൈക്കോടതിയില് സമര്പ്പിച്ച ഹരജിയില് വാദം പൂര്ത്തിയായി. കോടതി കേസിന്റെ വിധി പറയാനായി മാറ്റി വച്ചു. 2015 ലാണ് കേസിനാസ്പദമായ സംഭവം നിയമസഭയില് അരങ്ങേറിയത്.
യുഡിഎഫ് സര്ക്കാരിന്റെ കാലത്ത് ധനമന്ത്രിയായിരുന്ന കെഎം മാണിയുടെ ബജറ്റ് അവതരണ വേളയിലായിരുന്നു നിയമസഭയില് കാര്യങ്ങള് കയ്യാങ്കളിയില് എത്തിയത്. അതിനെ തുടര്ന്നുണ്ടായ കേസ് റദ്ദാക്കണമെന്ന ആവശ്യവുമായാണ് അന്ന് പ്രതിപക്ഷത്തായിരുന്ന ഇടത് സര്ക്കാര് ഇപ്പോള് ഹൈക്കോടതിയില് ഹരജി സമര്പ്പിച്ചത്. ഇതേ ആവശ്യം ഉന്നയിച്ചു കൊണ്ട് തിരുവനന്തപുരം ജില്ലാ കോടതിയില് സമര്പ്പിച്ച ഹരജി കോടതി തള്ളിയിരുന്നു. അതിന് പിന്നാലെയാണ് ഹൈക്കോടതിയില് ഹരജി സമര്പ്പിക്കാന് സംസ്ഥാന സര്ക്കാര് തീരുമാനിച്ചത്. മന്ത്രിമാരായ ഇപി ജയരാജന്, കെടി ജലീല് എന്നിവര്ക്കൊപ്പം തന്നെ വി ശിവന്കുട്ടി, കെ അജിത്ത്, സികെ സദാശിവന്, കുഞ്ഞഹമ്മദ് മാസ്റ്റര് എന്നിവരും നിയമസഭാ കയ്യാങ്കളി കേസിലെ പ്രതികളാണ്.
Read also : പൊലീസ് നിയമ ഭേദഗതി; മുഖ്യമന്ത്രിയുടെ പ്രഖ്യാപനം തട്ടിപ്പെന്ന് പ്രതിപക്ഷം