ന്യൂഡെല്‍ഹി: രാജ്യത്ത് കഴിഞ്ഞ 24 മണിക്കൂറിനിടെ 23,950 പുതിയ കോവിഡ് കേസുകള്‍ കൂടി റിപ്പോര്‍ട്ട് ചെയ്‌തു. ഇന്നലെ, 173 ദിവസത്തിനിടയിലെ രാജ്യത്തെ ഏറ്റവും കുറഞ്ഞ പ്രതിദിന രോഗികളുടെ എണ്ണം രേഖപ്പെടുത്തിയതിന് തൊട്ടുപിന്നാലെയാണ് രോഗബാധിതരുടെ എണ്ണത്തില്‍ നേരിയ വര്‍ധനവ് ഉണ്ടായിരിക്കുന്നത്. കേരളത്തിലാണ് ഏറ്റവും കൂടുതല്‍ കോവിഡ് രോഗബാധിതര്‍ ഉള്ളത്.
ആരോഗ്യ, കുടുംബക്ഷേമ മന്ത്രാലയത്തിന്റെ കണക്കനുസരിച്ച് ഇന്ത്യയില്‍ ഇതുവരെ റിപ്പോര്‍ട്ട് ചെയ്‌ത കോവിഡ് കേസുകളുടെ എണ്ണം 1,00,99,066 ആണ്. ഇതില്‍ സജീവ കേസുകളുടെ എണ്ണം 2,009,240 ആണ്.
അതേസമയം കഴിഞ്ഞ ഒരു ദിവസത്തിനിടെ 26,895 പേര്‍ രോഗമുക്‌തിയും നേടിയിട്ടുണ്ട്. രാജ്യത്ത് പ്രതിദിന രോഗബാധിതരുടെ എണ്ണത്തേക്കാള്‍ രോഗം ഭേദമായവരുടെ എണ്ണം വര്‍ധിക്കുന്നത് നേരിയ ആശ്വാസം നല്‍കുന്നുണ്ട്. ഇതുവരെയായി രാജ്യത്ത് 96,63,382 പേരാണ് രോഗമുക്‌തി നേടിയത്.
ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ചിന്റെ (ഐസിഎംആര്‍) കണക്കനുസരിച്ച് ഡിസംബര്‍ 22 വരെ 16,42,68,721 സാമ്പിളുകളുടെ പരിശോധനയാണ് നടത്തിയത്. ഇന്നലെ മാത്രം 10,98,164 സാമ്പിളുകള്‍ പരിശോധിച്ചു.
കഴിഞ്ഞ ദിവസം മാത്രം 333 കോവിഡ് മരണങ്ങളാണ് റിപ്പോര്‍ട്ട് ചെയ്യപ്പെട്ടത്. 1,46,444 പേര്‍ക്കാണ് രാജ്യത്ത് ഇതുവരെ കോവിഡ് മൂലം ജീവന്‍ നഷ്‌ടമായത്.
61,635 സജീവ കോവിഡ് കേസുകള്‍ നിലവിലുള്ള കേരളത്തിലാണ് രാജ്യത്ത് ഏറ്റവും കൂടുതല്‍ രോഗബാധിതര്‍ ഉള്ളത്. മഹാരാഷ്‌ട്രയാണ് രോഗബാധിതരുടെ എണ്ണത്തില്‍ രണ്ടാമതുള്ളത്. 59,502 രോഗബാധിതരാണ് നിലവില്‍ മഹാരാഷ്‌ട്രയില്‍ ഉള്ളത്.
അതേസമയം രാജ്യത്തെ സജീവ കേസുകളുടെ എണ്ണം 2.90 ശതമാനമായി കുറഞ്ഞുവെന്ന് കേന്ദ്ര ആരോഗ്യ മന്ത്രാലയം പറയുന്നു. മാത്രവുമല്ല രോഗമുക്‌തി നിരക്ക് 95.65 ശതമാനമായി ഉയര്‍ന്നതായും മന്ത്രാലയം അറിയിച്ചു.
