ന്യൂ ഡെല്ഹി: അതിവേഗതയുള്ള ഹൈപ്പര്സോണിക് മിസൈല് വിജയകരമായി പരീക്ഷിച്ച് ഇന്ത്യ. സ്ക്രാംജെറ്റ് എഞ്ചിന്റെ സഹായത്തോടെ പ്രവര്ത്തിക്കുന്ന ഹൈപ്പര്സോണിക് ടെക്നോളജി ഡെമോണ്സ്ട്രേഷന് വെഹിക്കിള് (എച്ച്.എസ്.റ്റി.ഡി.വി)യാണ് ഇന്നലെ വിജയകരമായി വിക്ഷേപണം പൂര്ത്തിയാക്കിയത്. ഒഡീഷ തീരത്തെ വീലര് ദ്വീപിലുള്ള ഡോ. അബ്ദുള് കലാം പരീക്ഷണ കേന്ദ്രത്തില് നിന്നാണ് പേടകത്തിന്റെ വിക്ഷേപണം നടന്നത്. തിങ്കളാഴ്ച്ച രാവിലെ 11 മണിയോടെയായിരുന്നു വിക്ഷേപണം.
ശബ്ദത്തെക്കാള് ആറിരട്ടി വേഗത്തില്, അതായത് സെക്കന്റില് 2 കി.മി. (മാക് 6 വേഗത), സഞ്ചരിക്കാന് കഴിയുന്ന പേടകമാണ് ഇന്ത്യ നിര്മിച്ചത്. അഗ്നി മിസൈല് ബൂസ്റ്ററാണ് വിക്ഷേപണത്തിനായി തിരഞ്ഞെടുത്തിരുന്നത്.ആദ്യ 30 കി.മി. ബൂസ്റ്ററിന്റെ സഹായത്തോടെ സഞ്ചരിച്ച പേടകം,ബൂസ്റ്ററില് നിന്ന് വേര്പെട്ടശേഷമാണ് അതിവേഗത കൈവരിച്ചത്. 20 സെക്കന്റ് നേരം ജ്വലിച്ചശേഷമാണ് പേടകം, മാക് 6 വേഗത്തിലെത്തിയത്. മാക് 5 മുതല് 10 വരെയാണ് ഹൈപ്പര്സോണിക് മിസൈലുകളുടെ വേഗത.
ഡി.ആര്.ഡി.ഒ മേധാവി സതീഷ് റെഡ്ഡി മിസൈല് പരീക്ഷണത്തിന് നേതൃത്വം നല്കി. പ്രധാനമന്ത്രി നരേന്ദ്ര മോദി വിക്ഷേപണത്തിന് ചുക്കാന് പിടിച്ച ഡി.ആര്.ഡി.ഒയെ ട്വിറ്ററിലൂടെ അഭിനന്ദിച്ചു.
Congratulations to @DRDO_India for successful flight of the Hypersonic Test Demonstration Vehicle today. The scramjet engine developed by our scientists helped the flight achieve a speed 6 times the speed of sound! Very few countries have such capability today.
— Narendra Modi (@narendramodi) September 7, 2020
ദീര്ഘദൂര മിസൈലുകളുടെ നിര്മാണത്തില് മാത്രമല്ല കുറഞ്ഞ ചിലവില് ഉപഗ്രഹ വിക്ഷേപണം നടത്തുന്നതിനും ഹൈപ്പര്സോണിക് മിസൈലുകള് സഹായിക്കും. മിസൈലിന്റെ പരീക്ഷണവിജയത്തിനുശേഷം, ഹൈപ്പര്സോണിക് മിസൈലുകള് കൈവശം വെക്കുന്ന രാജ്യങ്ങളുടെ കൂട്ടത്തില് ഇന്ത്യയും ചേര്ന്നു. അമേരിക്ക, ചൈന, റഷ്യ എന്നീ വന്ശക്തികള് മാത്രം അടക്കിവാണിരുന്ന ഹൈപ്പര്സോണിക് യുഗത്തിലേക്കാണ് ഇന്ത്യയുടെ പേരും എഴുതിച്ചേര്ക്കപ്പെട്ടിരിക്കുന്നത്.